Diasabra ultimo, un famia drumi riba cama den tur trankilidad, diripiente a scucha un zonido duro y recherchenan arma a drenta nan cas, maltrata nan dilanti nan yiunan y despues bandona e cas. A resulta cu nan tabata buscando un tal Miguel Gomez, sospechoso di a tira riba hende pariba di brug. Ora nan a ripara cu nan a drenta cas robes, nan a bay, laga e porta kibra atras y awo ningun hende kier para responsabel.
Rachelle Kock a papia cu 24ora.com (Prome den Noticia) pa vocifera su keho publicamente, pa e forma autoritario y estilo “politiestaat” den cual husticia ta maniobrando na Aruba. E ta biba cu su yiunan y su pareha na Kiviti # 29, cerca di Weg Sero Blanco na San Nicolas. E nunca a spera un bishita asina, pasobra nan no ta hende di problema, no ta envolvi den crimen, ni nada. E forma con Polis ta drenta bo cas arma, sin un apoderacion di Hues, ta un acto castigabel pa ley!
E recherchenan a keda puntra pa Miguel, cu nan ta buscando Miguel. Den e proceso nan a maltrata su pareha, keriendo cu e ta e tal Miguel ey. Ora el a identifica su mes, nan a lag’e na paz y despues di a busca den tur camber sin haya nada, a bandona e cas. Na nan salida un recherche a bisa cu nan ta regresa un djis. Despues di un ora el a yega bek cu un “machtiging” di Hues Comisario pa por a drenta e cas, algo cu pa ley NO ta permiti ni aceptabel.
Rachelle Kock ta pidi pa Gobierno cubri e gastonan di drecha su porta. Nan a kibra e porta ora di drenta y a haci algun daño mas den e cas. Riba e apoderacion pa drenta cas, ta poni cu Gobierno lo cubri e gastonan. Na departamento di recherche na San Nicolas ningun hende ta asumi responsabilidad pa e acto. Nan ta culpa Team di Aresto pa e mal trabou y posibel eror aki. Ora yama Ministerio Publico, nan no ta contesta y a pidi pa manda un email. Riba e corespondencia electronico aki no a bin contesta ainda.
Ta bon pa comunidad sa, cu Polis ta obliga na mustra Bo un apoderacion di Hues Comisario na momento di drenta Bo cas. Sin e apoderacion ey, cu den terminologia penal ta sagrado, ningun polis no por subi bo propiedad. Den pasado casonan a yega di cay completamente na awa pa e tipo di erornan asina. Den e caso specifico aki ta pio, pasobra e sospechoso no ta biba na e cas menciona, pues a drenta cas robes, kibra nan porta y awo pa colmo ta resulta, sin un apoderacion di Hues. Cu a core trece un ora despues di a drenta y kibra e cas, ta un asunto serio y cu merece un investigacion di Ministerio Publico.
