Diadomingo dos unidad di polis a bay na e beach di Ex Bushiri Hotel. Personanan a yama polis preocupa pasobra tin basta parha morto banda di e beach poco pabou di e cura di waya di APA. Ora e polisnan a yega no a topa cu e parhanan. E intencion tabata pa mira e situacion y djey avisa instancianan concerni.
Agentenan a dicidi di cana full e area di beach pasobra unda a duna prome indicacion no tabata tin nada. Despues di un bon ehercisio canando riba beach, no a haya parha morto. Tampoco a topa cu hende cu por a duna indicacion pa e yamada cu a drenta di parha morto. Tur cos ta mustra cu ora polisnan a bay, tur parha a resusita y bula bay.
