Apenas dia a habri awe dialuna, cu habitantenan di un cas situa den Semeleerstraat tabata bebiendo koffie den veranda, cu nan a ricibi bishita di un criatura desconoci pa nan. Actualisa: E mucha tabata na cas di e wela. Polis a hib’e bek y a atende cu esunnan responsabel.
A purba comunica cu ne pa sa con yam’e, con yama su mayornan y unda e ta biba, pero nada. A sali pafo mira si ta topa cualkier mayor buscando nan yiu, pero sin resultado. A dicidi di yama Polis mesora pa tuma e mucha over y purba busca e mama y tata cu mester ta desespera cu nan yiu di mas o menos 3 aña di edad ta perdi.
Polisnan den nan trabou ta encontra tur tipo di situacion pero na momento cu ta trata di criaturanan inocente, e ta bira algo special. Nan tambe a combersa un poco cu e criatura pa purba haya informacion si acaso e sa unda e ta biba of nomber di su mayornan. Comprendibel cu na e edad ey e criatura ta inocente y no ta detaye cu e lo sa di duna.
E habitantenan di Semeleerstraat a declara cu e mucha ta masha spierto y a haci su mes na cas mesora, a saluda cu masha bon manera y hasta combersa. E unico cos cu e combersacion no a yega na e informacion cu nan lo a desea di saca di e mucha.
