Diasabra atardi Polisnan a bay pura na Gielstraat den casnan di Pueblo na Noord. A drenta yamada di un pelea unda a maltrata un menor di 11 aña. Un adulto lo a maltrate. Na yegada di Polis a topa cu un homber cu ta tata di un di e muchanan. Na prome instante ora Polis a yega a pone para keto pendiente investigacion y claridad di e informacion cu a drenta. Polis scucha algun hende y hasta a bay den otro caya pa haci algun pregunta. A bin bek den Gielstraat. Asina a logra mustra e mesun homber cu ta tata cu e prome storia no ta klop. Polis a bay den e cas cu permiso di e doño pa papia cu e mucha di 11 aña.
Djey Polis a bay cune cerca su tata pafo. A confronta ambos y asina a aclarea e situacion. E muchanan tabata haci wega y diripente nan a cuminsa bringa. Esun di 11 aña a flip y perde cabes. Aki e tata a interveni y atende duro cu su yiu y ora el a bay fuerte cu su yiu, otronan a lanta cu e tata tambe. E mucha a haya un sla na brasa pero no grave. Polisnan a papia largo cu e partidonan y splicanan cu no mester yega asina leu caminda amigonan cu ta hunga ta bringa y djey tata tambe ta cay aden y agredi su yiu. Mester evita problema prome cu tur cos. Despues di casi un ora cu Polis a atende e problema, trankilidad a reina y cu e speransa cu no tin mas problema. No tabata necesario haci detencion. A papia cu mas miembro di famia cu tabata tey y amistadnan di cas. Tur a compronde.
