Segun prome minister Evelyn Wever a bisa su yiu homber, acusa door di Jan de Ruijter di ta den negociacion cu baho mundo cu bendicion di gobierno, a cuminsa un caso den corte unda ta pidi rectificacion y dispensa pa e acusacion haci contra dje.
E mandatario tabata den un programa LIVE dialuna mainta cu e presentador Hans Geerman na Top FM. Den e programa e mandatario a papia cu Geerman riba diferente tema, pero tambe a bini dilanti e declaracion cu de Ruijter, hunto cu Michael Williams, a duna siman pasa na 24ora.com
E prome mandatario a bisa cu despues di retiro di Marisol Lopez Tromp, el a sinti e atakenan ta bini di tur banda, y tin biaha hopi baho. “Mi tin duele di Jan de Ruijter, pero el a lansa acusacionnan hopi baho contra mi yiu, no contra mi mes, y basa riba mentira.”
El a enfatisa cu el a drenta politica pa sirbi su pais y no interes di ningun hende. Pero e no por acepta cu ciudadanonan ta ataca famia di politiconan di e forma aki. “Mi a haya e cos aki un acto di cobardia. E politico t’ami. Bo kier debati cu mi, haci’e, pero ban laga famia afo, no ataca famia pasobra e ta mustra con debil bo ta para.”
Den henter e declaracion, de Ruijter no a lansa ningun acusacion y prueba contra dje, pa cual ta dificil e bay Corte. El a recorda con den pasado de Ruijter a aserca MEP pa baha gobierno di AVP y cu e tabatin mester di placa, algo cu MEP no tabatin. “E ta un tipo di hende cu ora e por uzabo e ta bon cu bo, y ora bo no dun’e su kier, e ta lastrabo manera cu el a haci’e siman pasa. El a haci e cos aki cu varios partido politico. Ora cu su contract cu Minister Lampe a caba, el a lastra e mandatario masha mahos mes. E tempo ey el a acerca nos pa traha den gobierno, pero tabata baha gasto y no por a yud’e. E ora el a pidi pa traha pa MEP. E tabata kier a saca tur sushedad riba AVP, POR, RED, Marisol Lopez Tromp y tur hende. Nos a nenga pasobra nos no tin placa y no ta traha di e forma aki. Mi ta kere cu awo e ta saca su rabia pasobra no a yud’e.”
Su yiu si a bay Abogado y ta canando e caminda pa bay Corte, pasobra e expresionnan aki por daña su carera.
Si e mandatario a bisa cu Cannabis Medicinal ta un pilar economico cu ta explorando. Un tema cu hopi hende ta papia di dje. Ken cu ta por papia riba cierto topico, pero pa conclui cu tin corupcion y sin tin prueba, e mandatario ta haya cu esaki ta algo di mas. “Mi no tin ningun yiu ta traha cu mi y nan no por actua of papia den mi nomber. Pa loke ta cannabis no ta den mi man tampoco, pero ministernan Dangui Oduber y Xiomara Maduro. Ami no tin autoridad pa dicidi ken ta haya tereno y no mi yiu. Mi mes tin apenas un siman cu e cartera aki. Ademas, otorgamento di tereno ta tuma luga na DIP, director, mas un hende. Minister no tin e autoridad aki. Loke Jan de Ruijter ta bisa ta puramente mentira.”
Si e ta haya cu tin un organisacion criminal di gobierno, ta deber di Jan de Ruijter pa cana e caminda di ministerio publico. “Be a man not a mouse,” ta su mensahe cu el a manda pa de Ruijter den e programa di Hans Geerman na TOP FM.
