Aruba ta pasando den un temporada hopi dificil y e profesion liber di Piscado ta un di esnan mas vulnerabel. Promesa haci y no cumpli, ta pone nan pan na peliger pa cual nan a bisa ta basta. Piscadonan Uni ta organisa un manifestacion cu ta tuma luga dia 4 di september.
Nan ta haci un apelacion na Piscadonan di tur bario, representantenan di Handicurari, pero tambe amantenan di pisca pa uni den e manifestacion cu ta tuma luga riba 4 di september, 2020.
Nan tin un preocupacion hopi grandi pa nan pan di cada dia, y esaki ta basa riba leynan bieu cu ta pone na peligro nan trabou, stroba nan di trece cuminda cas pa nan famia den e temponan dificil aki. Nan ta menciona por ehempel, e ley di tiramento cu Harpoen cu ta ancla hustamente den e ley bieu menciona. Durante campaña politiconan a trata di gana voto di Piscadonan campañando cu e tema aki,haciendo promesa pa trece cambio. Awe tres aña despues nan ta enfrentando e mesun problemanan ainda.
Pa logra pusha e cambionan aki no tin otro forma cu uni e Piscadonan di Aruba den un protesta. Nan ta haci un apelacion tambe na tur cu ta apoya nan causa pa yega cu nan famia na e manifestacion aki di dia 4 di september.
Piscadonan ta risca nan bida riba lama, cada biaha cu nan subi nan boto y subi lama grandi pa trece pisca fresco pa pueblo di Aruba, y no por ta asina cu ta limita nan den nan trabou y hasta confisca nan mercancianan.
Keda pendiente pa resto di detaye di e manifestacion.
