Confiansa y transparencia ta importante y pues un bes mas Horacio Oduber Hospital ta comparti cu comunidad di Aruba e cifranan pa loke ta luna di april 2024. E cifranan aki di HOH Aruba ta un indicacion di cuanto pashent Hospital ta atende mensualmente, e promedio di estadia di pashent na HOH, cuanto operacion ta tuma luga, cuanto test diagnostico departamento di radiologia ta haci y mas.
Na maart a hospitalisa 780 pashent y na april esaki a subi pa 828 pashent. Interesante pa analisa ta cu di e 828 pashent admiti un 32,4% tabata admision planea. E promedio di duracion admiti na HOH na luna di april tabata 4,4 dia cual ta mas halto cu na maart (4,1 dia). Na april ocupacion di cama un bes mas a subi pa 93,7% cual ta 8,8% mas halto cu na luna di maart.
Un total di 577 operacion a tuma luga den nos salanan di operacion cu ta mas cu na luna di maart (514 operacion). Tin mas hospitalisacion na luna di april manera ya menciona y pues por mira esaki como un indicacion cu e cifra di operacion tambe ta subi automaticamente.
Departamento di Emergencia a atende na luna di april 2704 pashent cual 41,3% di pashent no tabata rekeri cuido di emergencia.
A nace na luna di april 45 baby mucha homber y 25 baby mucha muhe (total 80 baby). Y na april Bloedbank Aruba a ricibi un total di 193 donacion di sanger.
Specialistanan den servicio di Hospital a haci un total di 7087 consulta cu pashent cu ta 296 consulta mas cu na luna di maart y 732 consulta mas cu na luna di februari. Departamento di radiologia a haci un total di 3970 test manera CT scan, MRI, echo y mas. E cifra aki ta mas abou cu na luna di maart mirando cu durante april mester a muda algun test di radiologia en conexion cu trabounan di construccion cu ta andando na Hospital. Un total di 11263 persona a bishita LABHOH na luna di april pa haci nan test diagnostico. Y na luna di april un total di 791 pashent a sali for di Hospital y regresa nan cas.
Hospital ta gradici tur 1200 empleado pa nan esfuerso continuo y ta recorda comunidad cu den cualkier momento no lubida cu HOH semper t’ey!
