E pianista Hulandes, Alexander Kraft van Ermel ta na Aruba un biaha mas. Diabierna ultimo a tuma luga un presentacion den Cas di Cultura. Ta su di tres presentacion aki na Aruba.
Kraft van Ermel a conta cu e presentacion aki ta uno special p’e. Alexander tin un conexion special cu Aruba y Corsou. Su welo ta Wim Statius Muller, kende ta un pianista famoso. Cu su shete aña el a cuminsa toca piano, ora cu el a haya interes pa traha musica.
Durante su concierto el a presenta diferente composicion di Aruba y Corsou. Durante su gira na Europa, e ta presenta e canticanan típico di Caribe.
E idea pa e concierto a bin di hopi tempo caba. Mirando cu esaki ta su di tres biaha den Cas di Cultura, el a scoge tema cu tur den sala por sinti.
Locual a nota durante su presentacion, ta cu, e ta duna un splicacion. Sea ta prome cu e wals, danza of mazurca, Alexander a splica un poco di e historia y djey ta cuminsa toca.
E ta kere cu esaki ta haci’e un poco mas interactivo cu e publico y no simplemente sinta un ora largo ta scucha un artista toca su piano.
E ta spera cu pronto e por presenta un concierto mucho mas grandi. E ta mirando riba un album di “Caribbean Classic.”
