Diaranson 23 januari 2019 den un Cas di Cultura completamente jen a tuma lugar e prome lectura den cuadro di e projecto “Building knowledge 2019”. Nos plataforma a ranca sali cu e prome lectura cu dos orador.
“Nos ta sumamente orguyoso cu e prome lectura “Leadership & new generation of politicians” a sobrepasa tur expectativa cu un sala completamente yen. Den e sala tawatin hopi hobennan cu a asisti pa sa poco mas di e tema di liderazgo. E prome orador tawata sra. Sharleen Tromp cu a duna un presentacion titula “Your potencial of influence”. Prome cu e la introduci su mes e la presenta un video di dr. Martin Luther King jr. “what is your life’s blue print”. E video tawata un intro impactante pa asina Sharleen despues por a elabora riba e “4 P” entre otro pasion, potential, proposito y e persona.
E segundo orador tawata sr. Karsten Klein di CDA cu a elabora entre otro riba su entrada den politica como hoben, su trayectoria, rol di hobennan den politica y riba ampliacion di posibilidadnan di “Erasmus exchange program” pa studiantenan di Aruba. Su discurso tawata uno hopi elocuente y bon acepta pa e publico.
Pa clausura lider di partido AVP, sr. Mike Eman a duna di conoce cu hobennan lo bai tuma rolnan importante den politica mundialmente. E la referi na e ultimo sucedido na Venezuela, unda cu sr. Juan Guaido di apenas 35 aña ta dalnan stapnan grandi pa su pais. Mescos e lo ta tambe na Aruba, poco poco hobennan lo no tin miedo mas y polarisacion lo bai wordo minimalisa. Sr. Eman a pidi e publico un aplauso pa Plataforma Hobennan Profesional cu a tuma un iniciativa unico den organisa lecturanan cu ta contribui positivamente na e desaroyo di cada un ciudadano.
Plataforma Hobennan Profesional ta contento di por a haya e oportunidad di demostra cu nan por aporta na conocimento cu lecturanan diferente. “Mescos cu nos ta hasiendo cu e projecto di “Tienda di Ley” por spera cu nos lo continua na inverti den conocimento y hobennan por spera hopi mas di PHP den 2019. Lo nos trata na “empower” hobennan den nos comunidad y expone nan talento y habilidadnan. Gradicimento ta bai na tur persona cu di un of otro forma a contribui na e exito di nos prome lectura.”
