E señora no tabata sincero cu polis ora el a informa diadomingo anochi laat cu un auto straño ta persiguie y a dal den dje na altura di Riu Hotel. E dama tabata bayendo pa busca su mama na trabou na Hyatt Regency. Polis a yega cu urgencia pa para e persecucion aki, pero a resulta mas bien un problema amoroso di cual e homber no kier acepta cu “amor a caba”.
Polis a topa ambos auto na salida di Playa Linda Beach Resort y a para ambos. Cada un polis a papia cu un auto, di cual un tabata e dama y e otro e hende homber. Storia largo cortico, e homber ta stima e hende muhe ainda y no kier pa e bay. E hende muhe no kier nada mas cu su ex y a bisa polis cu e homber ta persiguie tur caminda y ta “stalk” e.
Polis a intermedia te unda por y a splica ambos riba nan derecho y nan obligacionnan. A splica e homber specialmente cu masha lihe awendia e dama por keh’e di “stalking” y hues lo por prohibie di yega mucho cerca di su ex. A puntr’e si ta esey e kier of e no ta kere cu ta miho coopera y duna e señora un chens pa haci su bida y pa duna tempo “tempo”.
Na final polis a logra, na un forma tactico, pa trece paz, por lo menos pa awe nochi, den e ex-pareha aki. A mustra nan riba e hecho cu no por hunga “politie en dief” cu otro riba pleno corridor turistico dilanti hotelnan highrise. Ambos a tuma conseho di autoridad pa bay nan cas, pensa hopi awe nochi y realisa cu mañan ta un otro dia cu mas oportunidad pa ambos.
