Fe y confiansa den Dios, awendia ta mas cu necesario cu nunca, pasobra sin fe ta imposibel agrada Dios, y mas ainda ora nos ta mira cuanto maldad ta avansa, y cuanto hende ta perdiendo confiansa pa motibo di tur locual ta pasa rond di nan.
Hende cu a deposita confiansa den hende y cu awor ta ripara cu hende no por yuda nan, hende cu a pone confiansa den material, y cu ta ripara cu nada no a cambia, y cu nan no ta bayendo dilanti manera nan a spera.
Tin hende cu a bandona caminda di Dios y ta biba den idolatria y bruheria, pero awor ta ripara cu den caminda di scuridad tampoco tin salida.
Isaias capitulo 26 versiculo 3+4 ta bisa: Lo Bo warda den pas perfecto, esun cu su pensamento ta permanece den Bo. Confia den Señor pa semper, pasobra den Dios e Señor nos tin Baranca Eterno.
Den Jeremias capitulo 29 versiculo 11 e lo guia bo riba e bon caminda, y Josue capitulo 1 versiculo 9 ta mustra bo cu semper bo por conta cu Dios.
Tira bo carga riba Señor y E lo sostene bo: Nunca e lo permiti pa e husto wordo movi ( Salmo 55 versiculo 22).
E mundo ta carga cu decepcion y cu desapunto, pero Señor ta esun cu ta lanta Su pueblo y nunca ta laga esunnan cu kere den Señor pasa berguensa.
Esun cu paga tino na e Palabra lo haya bondad, y bendiciona ta esun cu ta confia den Señor.
Encomenda bo caminda na Señor,confia den Señor y Señor lo hacie pa bo.
Bendiciona ta tur esunnan cu ta tuma refugio den Señor.
Tur locual Señor priminti E ta cumpli cu ne.
Den Jeremias capitulo 17 versiculo 15 Señor ta bisa:
Maldiciona ta esun cu ta confia den hende, y ta haci carni su fortalesa, y kende su curason a aleha for di Señor.
Pasobra e lo ta manera un mata den desierto, cu lo no ripara ora prosperidad bin. Ma lo biba den luga seco den desierto, un tera di salpeter, sin habitante.
Bendiciona ta e hende cu ta confia den Señor y kende su confiansa ta den Señor. Pasobra e lo ta manera un palo planta canto di awa, cu ta manda su raisnan bay na un corida di awa, y cu lo no tin miedo ora calor bini, ma su blachinan lo ta berde, y den e aña di secura e no ta preocupa, ni laga di duna fruta.
Señor ta hala nos atencion pa nos no pone confiansa den hende, y pa nos no wordo gaña, pa evita depresion y pone nos salud mental na peliger.
Pero te ainda tin hopi hende ta kere cu nan no tin mester di Dios, y cu nan ta depende di nan mes, di nan placa y nan posicion, cu nan ta grandi y poderoso, pero Dios ta manda aviso pa nos pasobra hende ta manera yerba, mainta e t’ey y atardi e a seca (Salmo 37 v 27+28).
Keda mantene confiansa den Dios y corda cu pa Dios nada ta imposibel (Lucas 1 versiculo 37).
Ta tempo pa nos acerca e trono di Dios cu confiansa, si laga tur hende busca Dios di nan henter nan curason, y no perde tempo den maldad, pasobra cu maldad ningun hende lo bay dilanti.
Laga e bon ehempel brota tur dia for di nos curason, y asina nos yiunan por sa for di chikito cu nan mester confia den Dios, y no depende riba locual mundo ta ofrece.
