Laga nos splica bon cla pa tur hende compronde cu tin dos tipo di orguyo: Na prome luga e orguyo cu Dios ta odia cual ta para skirbi den Proverbionan 8:13 cu ta bisa lo siguiente: E temor di Señor lo ta pa odia maldad: Orguyo, arogancia,y mal caminda, y un boca perverso mi ta odia.
Na di dos luga ta bini e orguyo cu ta para skirbi den Galationan 6:14;Ma ohala cu nunca lo mi gloria sino den e cruz di nos Señor Hesus Cristo, door di cual e mundo a wordo crucifica pa mi y ami pa e mundo. Esey ta nifica cu cualkier logro cu bini den nos bida. Nos tin di duna danki na Dios prome, pasobra si no tabata pa Dios, nos lo no a logra, pasobra ta Dios a duna nos e bida.
Ta tempo pa lubida e expresionnan descabeya, manera mi tin fe den mi mes, mi ta orguyoso di mi mes, tur locual cu mi tin ta mi mes a traha pe, si no ta pa mi awe boso no tin nada. Corda cu tur bon logro den nos bida ta pa medio di Dios.
Pasobra tin hende ta scoge mal caminda tambe pa nan logra e cosnan y eynan orguyo ta choca nan.
Pero ta bon pa nos tur sa kico ta spera hende orguyoso y tur organisacion caminda orguyo ta resalta:
Isaias 13:11 ta para skirbi: Asina lo Mi castiga mundo pa su maldad,y e malvadonan pa nan inikidat. Tambe lo Mi pone fin na e arogancia di esunnan orguyoso y rebaha e orguyo di hende cruel.
Actualmente riba e mundo aki satanas a los un spirito di engaño cu miyones di hende no ta kere cu Dios. Ta castiga hende pa nan orguyo y maldad.
Orguyo pasobra nan ta bay contra boluntad y principio di Dios y no ta respeta Dios.
Maldad pasobra nan ta tribi di atenta contra Dios su creacion.
Orguyo ta pone nos cera wowo pa necesidad di otro.
Orguyo ta haci nos ciego pa nos no mira tampoco respeta e palabra di Dios.
Orguyo ta pone nos pensa grandi y halsa nos mes.
Orguyo ta haci nos mente carnal, y nada spiritual di Dios, pasobra orguyo ta bini di diabel.
Orguyo ta pone nos rebaha otro persona.
Orguyo ta pone nos surpasa nos habilidadnan, e ta pone nos den competencia cu otro.
Orguyo ta pone nos desea puesto di otro y tambe horta puesto di otro.
Orguyo ta trece pleito y division.
Orguyo ta promove comportacion mundano, sin respet pa Dios.
Orguyo ta contra e palabra di Dios.
Orguyo ta bay contra e persona y trabao di Señor.
Hende orguyoso no tin amor pa prohimo.
Hende orguyoso ta gusta broma pa tur hende por sa kico nan por haci (Esther 5:11-12).
Hende orguyoso nunca ta satisfecho (Esther 5:13).
Hende orguyoso ta haci cos di bobo.
Hende orguyoso kier resalta riba tur otro hende.
Pa motibo di bo orguyo por perde bo bida (Esther 7:9+10).
A keda proba cu hende orguyoso ta comete suicidio (1 Samuel 31:4-6), pasobra asina nan kier mustra interesante y tambe no confesa, ni tampoco duna cuenta di nan bida.
Ta un gran dolor pa mira con hende su orguyo a pone nan cay atras y bandona e caminda di Dios. Palabra di Dios ta bisa cu orguyo ta bini prome cu caida (Proverbionan 16:18). Ta dificil dirigi un famia y hogar den caminda di Dios cu un curason orguyoso y arogante. Oh Señor libra nos di orguyo.
