1 Juan 1:9 ta bisa: Si nos confesa nos picanan e ta fiel y husto pa pordona nos picanan y pa limpia nos di tur inhusticia. Dios no ta marca ningun hende. E sistema di mundo ta condena y no ta lubida, hasta tin hende ta kere cu Dios ta pordona nan so pero e otro persona Dios ta mantene su pica.
Si un hende comete un delito, kico cu e por haci si e confesa su pica dilanti di Dios arepenti y aparta di henter su curason for di maldad Dios ta pordon’e y dun’e un oportunidad nobo. (2 Cor 5:17)
Si a bo keda warda Rencor contra e persona, abo tin problema cu Dios pa bo falta di pordon. (Mateo 6:14-15). Tur pica tin nan consecuencia (2 Samuel 12:11.12).
Pasobra tin hende ta sinti nan mes malo of tin hopi duda ora nan mira un persona cu a cay a bolbe lanta y bay dilanti den bida y nan ta keda culpa e persona di e fout cu e haci hopi aña pasa, sea su problema ta placa, violencia, burachi, kibrado di matrimonio, homosexual, lesbiana, prostituta, ladron, matado, e persona ey si e arepenti, Dios ta pordon’e y yud’e lanta bek 100%.
Cerca Dios cos ta diferente, Dios ta pordona y Dios ta libra hende, mientras cu un banda malo ta desea pa un persona cu a comete un eror, otro banda Dios ta wak su curason y pordon’e. Ta esey ta nos Dios.
Salmo 103:12 ta bisa: “Mes leu cu pariba ta for di pabao, mes leu e aleha nos transgrecion for di nos.” Nos mester siña nos yiunan cu Dios ta pordona, pa nan no keda pega den tempo, kehando tur dia riba nan situacion y bibando den scuridad, pasobra nan ta pensa cu locual cu nan a haci ta impordonabel.
E falta di conocemento di hopi hende ta cu nan ta pensa cu mescos cu nan ta pensa di un persona asina Dios tambe ta pensa di dje y cu husticia di Dios ta pa nan banda so. Dios ta misericordioso y husto, si un persona arepenti, Dios ta pordona.
Cerca Dios no ta existi, cera un persona y tira e yabi afo, Dios ta un Dios di pordon, pa asina diabel no coy bentaha riba nos, pasobra nos sa diabel su plan di destrui. Cristo Hesus a muri na Cruz pa pordon di nos Pica.
Si bo yiu a haci algo malo, corda cu e no ta keda culpabel pa semper, si e sali na estado, sin caba scol, bo no por keda tira esey na su cara cada biaha cu bo mira e yiu.
Esey nos ta yama rencor di mayor, sin bo mes como mayor ripara, bo ta creando un barera entre abo y bo yiu y bo nieto.
Si un persona tabata infiel y el a confesa su eror, e persona arepenti y biba drechi bo no por sigui uza su fout como arma contra dje.
Den mente di hende hopi biaha ta biba e pensamento cu Dios no ta pordona, pa asina e enemigo mantene bo aleha di Dios.
Pedro cu a nenga Hesus, a wordo pordona y restaura y a bira un homber cu Dios ta uza pa haci milager.
Kico ta bo problema, Dios ta pordona si nos arepenti di curason, y aparta for di maldad.
Dios no ta marca ningun hende E ta bisa bo awe bay y no peca mas.
