E boluntad di Dios pa nos bida semper mester ta na prome luga, p’asina nos lo tin exito den tur locual cu nos ta haci. No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios. (Romanonan 12:2) Pa nos cana den boluntad di Dios, E ta exigi sinceridad di nos banda, E ta exigi fieldad di nos banda, E ta exigi obeduencia di nos banda, E ta exigi un gran respet y reconoce cu E ta Señor y doño riba tur cos.
Sea keto y sa cu Ami ta Dios, lo mi ta halsa memey di e nacionnan , lo mi ta halsa riba tera. (Salmo 46:10). Confia den Señor cu henter bo curason y no depende riba bo mes comprendemento. Den tur bo camindanan reconoce Dios y E lo dirigi bo berehanan. (Pasonan). (Proverbionan 3:5-6). Mas sincero nos ta cu Dios, mas confiansa nos tin den Dios, mas habri nos curason ta pa Dios, mas limpi nos bida ta den su presencia y mas e por uza nos pa Su honor y gloria.
Nos sinceridad y nos fe ta pone Dios crea un cura di proteccion rond di nos pasobra Señor sa ken ta esunnan cu berdaderamente ta di dj’E y e ta broma cu nan. (Job 1:8).
Caminda tin sinceridad, no tin orguyo, tampoco rebeldia, pasobra Dios ta goberna e curason, cu na tur momento ta dispuesto pa sirbi. P’esey nos mester haci lo siguiente: Somete nos mes na Dios, resisti e diabel y e lo huy bay for di boso. Hala cerca Dios y E lo hala cerca boso. Limpia boso mannan boso pecadonan y purifica boso curason, boso di curason dobel. (Santiago 4:7-8). Esey t’e pasonan cu mester tuma den nos bida, pa nos yega na un curason sincero dilanti di Dios y hende, cual ta un testimonio bibo cu nos ta sirbidornan di Dios.
Sinceridad no por copia, ni tampoco imita, pasobra asina cu nos sinceridad no ta firme y berdadero, e ta comberti su mes den falsedad y mentira y e ta stroba un comunicacion cu Dios. E enemigo no ta gusta hende sincero, pasobra nan ta proclama e grandesa di Dios, den cual tur hende ta mira y sa cu Dios ta soberano y cu nos tur mester entrega nos bida na Cristo Hesus. No worry cu pa motibo di bo sinceridad, bo amistad ta rechasa, pasobra mundo ta yen di maldad, malicia, inmoralidad, caminda mentira ta acepta y berdad ta critica.
Como cu den obediencia n’e berdad, boso a purifica boso alma, pa un amor sincero p’e rumannan, stima otro fervientemente di curason. (1 Pedro 1:22).
Bendiciona t’e mayornan cu ta sincero cu nan yiunan y cu ta guia nan den caminda di berdad, p’asina nan lanta cu e berdad di Dios den nan bida, pasobra un mayor sincero, cu conoce e berdad, mester sa cu ta imposibel cu su yiu por ta sincero sin conoce Cristo Hesus. Cristo t’e caminda, E berdad y E bida, ningun hende por yega serca e Tata si no ta pa medio di dj’E. Den Cristo nos ta ricibi sinceridad, honestidad, y integridad, locual e mundo kier imita, pero e no por ofrece, ya cu e mundo no tin e berdad di Dios.
Laga nos ta sincero y hala mas y mas cerca Dios, E ta warda nos cu brasa habri.
