Diasabra un rato promer cu 12:30 pm a sosode un accidente entre dos vehiculo na e ij-splitsing di Macuarima/Urataca. Pero emocionnan a bay halto na e sitio unda e chauffeurnan envolvi a dicidi di hala otro na mokete.
Mesora a despacha un patruya di polis y a observa cu un unidad di K-9 Unit tambe a presenta na e sitio, cla pa activa si ta necesario.
Segun informacion compila na e sitio, e auto marca KIA tabata riba e caminda di Macuarima y riba e ij-splitsing a dal den un pickup color blanco cu tabata riba e caminda cu ta bay pa Urataca Center.
E impacto tabata asina fuerte cu e daño tabata considerabel y a resulta den por lo menos dos persona herida.
Debi cu e dama pasahero di e pickup blanco a keda pega y no por a sali, a pidi presencia di dos unidad di bombero pa por brinda asistencia y saca e dama herida for di e vehiculo.
Paramediconan a trata tur esunnan herida den ambulance na sitio mes, mientras polis a desvia e trafico pa Roadservice y Polis di Trafico por a traha trankil.
