En conexion cu nos Dia Nacional 18 di maart, Parlamentario Molina a bishita St. Paulus School na San Nicolas diahuebs ultimo, unda e alumuno- y docentenan a organisa un tremendo evento cultural. Presente tambe n’e mainta special aki tabata Prome Minister, Evelyn Wever – Croes y Minister di Enseñansa y Deporte, Endy Croes. Na yegada cabesante di scol, Randy Arends a ricibi e mandatarionan, mientras e alumnonan tabata wardando e bishita cu hopi alegria. E ceremonia a inicia cu hisamento di e bandera di Aruba y canto di nos himno Aruba Dushi Tera.
Parlamentario Alvin Molina a conta cu e tabatin e honor pa hiba algun palabra n’e alumnonan unda el a enfatisa riba e color cora di nos bandera, cu banda di ta significa e sanger cora di e indjannan cu a bringa pa nos libertad den Rooi Frances, cu tambe ta e color di e stimacion cu nos tin pa nos isla.
Pero con bo ta expresa e stimacion? Door di stima nos mayornan, docentenan, door di stima otro, nos ta stima nos pais. Nos mester expresa e stimacion ne manera con nos ta trata otro.
Despues a bishita e klasnan pa aprecia e exposicion di e diferente temanan cu nan a prepara; Aruba di antes te cu awo.
Cada klas durante seis siman a haya les di e historia di Aruba, cada klas riba nan nivel. Y diahuebs ultimo a culmina cu un bunita exposicion di tur loke nan a siña y e materialnan cu nan a traha. Tambe por a saboria e dushi cuminda crioyo y pasaboca cu e alumnonan a presenta.
Alvin Molina a keda hopi impresiona di por a admira locual e studiantenan a presenta. E ta felicita e alumnonan y docentenan di St. Paulus School cu e bunita exposicion y evento cultural. Alabes gradici e mayornan cu ta sostene nan yiunan, yuda nan cu les y engrandece cultura di Aruba.
