Awe mainta den un rueda di prensa, partido RED Democratico, representa pa lider di e partido, Ricardo Croes como tambe Rudy Lampe, a felicita un y tur riba 4/20, mandando asina un pabien na tur activista, organisacion, dokter, gobierno, comerciante y tur rasta y grupo di persona cu ta haci uzo di cannabis medicinal of recreacional. Croes a sigui bisa cu no ta un secreto cu partido RED ta boga pa legalisacion di cannabis y cu awe a para dilanti di Corte di Husticia, pasobra ta importante pa gobierno “asina lihe cu ta posibel decriminalisa cultivacion, bendemento y uzo di cannabis recreacional y medicinal.”
Asina Croes a sigui bisa cu motibo pa esaki ta cu ya pa mas cu 40 aña caba tabata demostra rond mundo cu no ta cannabis ta representa e peliger den nos comunidad, sino alcohol y sigaria, cu hasta den un rapport di AZV a indica esaki. El a recorda alabes cu pa tanto aña a persigui y stigmatisa tur activista y creyente den cannabis, pero cu nan a para fuerte y cu ta danki na esey, awendia den Caribe y tambe na algun parti di mundo, a bin cambio.
El a lamenta cu den e gobierno anterior, den cua e tabata forma parti, a firma un acuerdo di gobernaciona, tabatin puro gañamento y promesa falso relaciona cu esaki y asina no a logra realisa e obhetivo di legalisacion.
Pa un relato mas amplio, lesa edicion di TREMPAN.
