Sin niun reaccion riba carta di GIK y sin yama reunion, pidi pa 4 fraccion den parlamento, ‘doodleuk’ ta habri buskeda nobo pa un operador pa refineria Isla.
A declara reapertura di Isla prioridad nacional. E operado cu a scoge a defrauda nos pais. Grupo GIK, e di dos den fila, a bin dilanti sigurando cu e si por cumpli cu e condicionnan y a acusa 2 minister di a actua contra di ley. Ciudadano y Banco Central a entrega keho na Ministerio Publico.
Gobierno MFK a keda keto. E representantenan di pueblo a pidi reunion riba GIK su carta acusatorio, presidente di parlamento, miembro di MFK, tambe a keto mescos cu gobierno pa algun siman largo caba.
Pa corona obra, sobra di MFK su fraccion tambe ‘staat erbij en kijkt ernaar’.
Awor, cu cara laba, manera nada no a pasa, sin splicacion riba e caso GIK, RdK ta anuncia cu ta cancela tur cos y cu ta bay start un proceso completamente nobo. Cu tur esaki riba pantaya, Partido PIN mester puntra: ta pa spetakel Pisas y MFK tin e pueblo di Corsou?
Increibel
Pa medio di su representante, dr. Ruthsel Martha, Grupo GIK, despues di e debakel completamente evitabel cu CPR, ta insisti di si por ranca e proyecto inmediatamente. Partido PIN a pensa cu si di berdad reapertura transparente di nos refineria ta prioridad y cu si interesnan di pais ta riba tur cos, gobierno lo a sali y duna splicacion riba e ponencianan di GIK y habri caminda pa dialogo.
Si e no a sali di su mes, PIN a pensa cu sikiera riba invitacion di parlamento, minister presidente Pisas lo a sali y duna claridad riba e asunto aki den staten, siendo e unico plataforma adecua considerando e interes nacional.
Sinembargo, e presidente di parlamento, colega di partido di Pisas, ‘dundulando’ mescos cu ora a pidi claridad riba e documentonan falso di CPR, no a ni saca e convocacion pa minister presidente bin splica e asunto di GIK, dilanti representacion di pueblo. Loke ta mas lamentabel ta cu e resto di MFK ta sinta wak man crusa con famia y e contratistanan ta bay den perdicion.
Pregunta
Tur esaki ta pone Partido PIN puntra si ta pa spetakel parlamento tin sobra di Corsou. E coalicion actual no ta kere cu e cuestion GIK merece un splicacion prome cu habri un siguiente ronda pa busca operado? Casnan di famia y e empresarionan contratista no ta bal un splicacion? Partido MFK su directiva y e miembronan di fraccion no ta kere cu Corsou merece mas respet cu esey?
Si e coalicion actual no ta suficiente autocritico pa exigi un splicacion pa e pueblo cu e ta representa, e ora ey Partido PIN lo kier confia cu, na nomber di cada ciudadano, sikiera e di cuater poder democratico, esta prensa, lo convence MFK y e gobierno actual pa duna splicacion riba e asunto GIK prome cu start un buskeda nobo di operado pa Corsou su instalacionnan petrolero.
