Durante e tratamento di presupuesto di TPEF den Parlamento, manera semper e cas di pueblo ta bira un circo, unda cu coalicion cu oposicion ta tilda otro di tur sort’i cos.
Asina tambe dado momento, parlamentario independiente, mr. Gerlien Croes, durante cu e tabata dunando su betoog, a reclama Presidente di Parlamento, mr. Edgard Vrolijk di no a hala atencion di un minister, pa a papia palabra malo den sala di parlamento. Esaki, segun Croes ta un falta di respet n’e Organo mas halto di nos constitucion y tambe n’e pueblo di Aruba.
Pero segun Presidente di Parlamento, e no por hala atencion di un hende si e mes no a scucha nada. Y niun otro hende den sala no a scucha nada, pa cual e no por haci nada. Segun Croes, coalicion ta scucha loke ta cumbini nan, nada mas.
Mas aleu, Croes a tild’e di tur cos: Di tabata den reunion robes, cu a hiba retorica- of disertacion den reunion cu no ta cuadra si. Pero, tur den sala a tuma nan tempo pa contest’e si. Ta como sifuera cu tur cos cu Gobierno haci, ta bon. Esey ta e realidad cu e miembronan di coalicion ta biba cu ne.
Minister di Turismo, Dangui Oduber, a bin Parlamento pa pidi yudansa. El a tilda parlamento di ta keha di e problemanan, pero no cu nan ta bin cu solucion. Pa Croes, esaki ta nifica cu Oduber mes no sa kico e ta haciendo, e no sa con pa resolve e problemanan!
Mientras tanto, coalicion ta dun’e pabien como sifuera cu ta aña el a haci! Esey ta e tristo realidad cu Aruba ta pasando aden.
