Durante conferencia di prensa semanal di AVP, parlamentario di e fraccion berde mr. dr. Ryçond Santos do Nascimento a relata con a invita Evelyn Wever-Croes pa un reunion publico pa e duna cuenta encuanto Arubahuis y e investigacion cu tin andando pa cu Minister Plenipotenciario, Guillfred Besaril. E reaccion di e prome mandatario, ta loke e parlamentario di AVP ta considera un hipocresia.
“Pakico mi ta bisa esaki ta un hipocrecia? Pasobra e contesta di Evelyn Wever-Croes cu tin un investigacion canando anto pa e motibo ey no por papia di e caso ey na e momento aki. Na mesun momento bo ta wak den reunion publico tras di reunion publico con Evelyn Wever-Croes ta papia di e caso di Benny Sevinger. Ta un hipocresia. Bo por papia di un caso si y di otro caso no.”
Mas aleu, e parlamentario ta comenta cu e caso di Benny Sevinger ta cerca Hues y tin un principio huridico yama subjudice cu Wever-Croes ta viola. “Busc’e riba Google pa bo mes. Bo no ta supposed di ta papiando di esey. Pero mientras tanto e no kier papia di e caso di Besaril probablemente pasobra mester tapa yen cos ainda, mester fix yen cos ainda.”
Santos dos Nascimento ta spera cu e caso di Arubahuis no lo ta di e erg ey na final di dia despues cu a slob tur caminda. P’e, esey ta e bottomline di e caso aki. Pero e ta bay mas leu pasobra “bo ta wak Evelyn Wever-Croes ta viola e principionan mas basico di nos sistema parlamentario. Un minister cu no kier bin duna cuenta na Parlamento. Bo ta wak e mesun cos cu Glenbert Croes cu ta haya un carta unda cu parlamentarionan kier un reunion publico cu ne. E no kier bin paso supuestamente e caso ta andando ainda. Anto bo sa kico ta e mas pio di tur esaki? Bo tin un presidente di Parlamento cu ta apoya e cosnan aki.
No ta prome biaha, segun e parlamentario di AVP. “Nos a wak e ful cuestion di Openbare Bijeenkomst; e ta e mesun idea. E presidente aki ta defende e openbare bijeenkomst cu no ta regla ningun caminda; cu no tin base legal, pero nos a wak cu no ta unico caminda cu e hendenan aki kier traha sin base legal. Nos a wak tambe den pasado, den caso di Marisol con nan kier spearfish Minister Marisol sin cu tabatin quorum den parlamento. Esey ta e realidad. Esey ta con kier goberna e pais aki. Anto esey simplemente ta un hipocresia.”
