Diabierna mainta October 28, for di 7:45am te cu 10:00am, John Wesley College na San Nicolaas a organisa un Beroependag informativo pa tur nan studiantenan cu por a scucha profesional di diferente sector comparti nan experiencia. Cada un a comparti nos experiencia di studio, trabao, y profesion actual. En total a duna informacion na klas 1,2 y 3 den sessionan di 45 minuut. Aki por a comparti y motiva e studiantenan pa nan prepara nan mes pa identifica kico nan lo kier studia pe den futuro pa asina nan cuminsa considera cual profiel nan lo kies na scol. A encurasha tur studiante pa siña enfoca riba nan studio, keda determina y persevera pa alcansa nan soñonan.
Adicionalmente parlamentario di MEP, Marco Berlis, a duna un splicacion kico un parlamentario ta haci, kico ta su trabao, cual ta su debernan, cu kico tur e ta ocupa su mes y a siña nan di Trias Politica. E muchanan mes tabata participa activamente. Nan tabatin diferente comentario y pregunta riba diferente area y Berlis a tuma tempo pa contesta esakinan debidamente. Na final a saca algun potret y despues cu tur 3 klas, maestra y invitadonan hunto. A entrega un regalo bunita na cada invitado pa nan participacion cual a tuma cu masha aprecio.
Berlis a invita e cabesante di John Wesley pa considera bin cu e muchanan Parlamento pa asina nan por experiencia esaki personalmente y unda cu nan por conoce coleganan y haya mas informacion. E tabata un privilegio pa por a pasa algun ora cu e muchanan y Berlis ta gradici John Wesley College p’e invitacion pa por a participa den e Beroependag.
