Diamars a finalisa tratamento di Ley di Presupuesto 2022 di pais Aruba, unda a trata presupuesto di Ministerio di Asuntonan General, Innovacion, Organisacion Gubernamental, Infrastructura y Planificacion Teritorial como tambe di Ministerio di Finansa y Cultura. Parlamentario Alvin Molina a elabora cu ambtenaarnan tin e deber pa duna cliente e trato cu e merece y e unico manera cu e ambtenaar por duna un servicio optimal na su cliente, ta si e ambtenaar tambe ta ricibi un servicio optimal.
E ambtenaar merece ricibi su ‘bevordering’, ‘disciplinair’, un ‘opleiding’ y un vision den su trabou. En conexion cu esaki, Parlamentario Alvin Molina a haci un peticion na minister-president, como presidente di Conseho di Minister, pa hunto cu e otro ministernan percura pa optimalisa e servicio duna na e departamentonan di Gobierno.
Alvin Molina ta kere cu un servicio excelente na cliente, riba tur nivel den Gobierno y eventualmente na pueblo di Aruba, ta esencial pa di berdad nos logra pone ‘e ser humano central’. Parlamentario Molina ta kere cu ta importante pa nos pone mas atencion na ‘personeelszorg’. Percura pa nos hendenan ricibi loke nan merece.
Alvin Molina a entrega un mocion unda ta urgi Gobierno pa haci un investigacion con por agilisa e procesonan pa garantisa un funcionamento optimal di Departamento di Recurso Humano (DRH).
