Durante su bishita na Arubahuis Prome Minister mr. Evelyn Wever-Croes a ricibi for di man di Minister Plenipotenciario mr. Juan “Ady” Thijsen e prome ehemplar di e Relato Anual 2023 di Arubahuis, titula “De veelzijdige missie van Aruba in het Koninkrijk en de Europese Unie”.
Prome cu Minister Plenipotenciario Thijsen a presenta e relato anual el a bisa cu esaki ta un momento importante pa Arubahuis. Segun e mandatario, e relato anual ta mustra bo e vision y maneho y con ta ehecut’e.
“E relato anual ta ilustra e trabao di henter Arubahuis y di cada un di su departamentonan. Esaki ta un comienso y ta bay keda pa semper pa tur esunnan despues di mi. Un biaha mas mi kier bisa di ta hopi orguyoso cu e relato anual. E ta bunita y nos por mustra cu nos ta un gabinete responsabel; nos ta un gabinete cu ta traha duro y nos ta un gabinete cu ta stima nos pais, pero na mes un momento ta contribui na e comunidad Hulandes y Reino Hulandes,”asina Minister Plenipotenciario Thijsen a bisa y despues a entrega e prome ehemplar di e Relato Anual 2023 di Arubahuis na Prome Minister Wever-Croes.
Despues di a ricibi e Relato Anual, Prome Minister Wever-Croes a gradici Minister Thijsen y e personal di Arubahuis pa e trabao haci. “Claro cu e ta un momento di hopi orguyo y mi ta contento di tende cu e ta un trabao cu a wordo haci door di henter e personal. Tur por weita kico ta e resultado di bo trabao.
Ora nos mira bek den un relato anual kico tur nos a haci, e ta algo sumamente bunita. Un aspecto bunita di e Relato Anual ta cu a ilustra cu hopi potret y esey ta hopi importante, pasobra esaki ta bira bo ‘visitekaartje’. Cu esaki den man tur hende por mira kico Gabinete di Aruba ta para pe; tur kico Gabinete di Aruba ta haci. Arubahuis ta un instituto hopi importante pa nos, pa diferente motibo.
Pa nos como gobierno, pasobra e ta nos brug cu ‘politiek Den Haag’; pa nos hendenan cu ta bin Hulanda pa ayudo y purba na explora oportunidadnan cu tin y pa nos hobennan cu ta bin studia. Pero principalmente pa proyecta e imagen di Aruba eyfo”, tabata palabranan di Prome Minister di Aruba mr. Evelyn Wever-Croes na sigur un momento historico pa Arubahuis cu entrega di e prome Relato Anual.
