E hemchi a pasa a pasa over y bo pos tambe probablemente, si bo no kier paga e 25 florin extra cu e companianan di sceptic tank ta bay cuminsa cobra entrante diabierna 15 di maart. Manera un regalo pa Dia Nacional di Aruba esaki a yega pa e pueblo.
Tur esaki ta debi cu ainda no tin solucion pa e problema na e instalacion di rioolwaterzuiveringsinstallatie (RWZI) na Bubali y tambe e problema cu incinerator di gobierno ta funciona. Tur e sludge cu ta sali di procesamento di awa sushi na Aruba, mester bay den e incinerator. Pero corte a para operacion di esaki pasobra e no tin permiso di molester. Consecuentemente, for di aña pasa e sludge a bin ta acumulando y na e instalacion na Parkietenbos awo tambe a surgi problema pa cual no por brinda servicio.
E trucknan cu ta chica pos y haci tuberianan limpi awo mester bay te Zeewijk pa deshaci di e awa sushi. E companianan aki a cera cabes pa tuma medida mesora di aumenta e tarifa di chica pos cu 25 florin.
Desde inicio di siman a lock porta di RWZI Parkietenbos y te awe no a soluciona e problema. Sergio Koolman, un vocero di e grupo, a splica cu cierre di e planta a tuma luga sin cu DOW a informa e companianan concerni. “A djis mand’e riba Facebook,” el a bisa. E departamento tur dato di e companianan pero a prefera comunica di e forma aki. “Tin hende ta yega diasabra mainta pa basha y a haya sa cu e ta cera.”
E problema ta cu si mester chica un pos na Noord, mester subi cu ne te na SanNicolas. Cu e trafico, ta tuma nan mas tempo, pa despues pa staciona den fila pasobra ta un punto so tin pa deshaci di e awa. Di e forma aki, nan ta perde mas cu un ora di trabou pa dia. “Nos trabou ta cay atras door di mal funcion di e planta.” Na Parkietenbos cinco truck por basha pareu.
Nan preocupacion ta cu a skirbi “ta cera te proximo aviso” y no sa con largo esaki t, pasobra un siman a pasa caba. “Nos ta sinti cu awa sushi no ta prioridad di gobierno. Nos kier un solucion rapido, pasobra e subimento pariba cada rato ta gasto adicional. Bo trabou ta bira menos y no por cumpli lihe cu clientenan. Nos kier un fecha ki dia ta habri e luga aki bek.”
Asina el a bisa “nos a haya nos mes obliga cu nos mester subi nos prijsnan pa haci e trabou pa e clientenan. Nos mester hisa prijs pasobra nos ta core cu perdida. … E gremio a dicidi cu nos ta pone 25 florin extra pa cada pos cu nos haci desde diabierna en adelante. Nos no por sobrevivi di e sistema aki,” Koolman a bisa.
Luigi Rasmijn ta lamenta hopi e forma con a trata nan, tuma decision sin envolvi of informa nan. Ya caba un dia prome e tarifa di diesel a aumenta. En realidad, segun Rasmijn, e aumento lo mester ta di entre 25 pa 50 florin pa cubri e diesel pa subi te na San Nicolas y baha caba. P’esey nan kier reunion pa nan sa con e situacion lo ta di awo en adelante.
Por a compronde cu awe, diahuebs, ainda un reunion lo tuma luga.
