Na aña 1990 Carolyn Kelly a inicia su carera como cantante den Chicas Gaiteras, na un edad hoben di apenas diesseis aña. Na comienso Carolyn tabata un poco timido, pero sigur determina pa triunfa y realisa su soño di forma parti di Chicas Gaiteras y bira un di e miho bosnan y interprete cu un estilo unico cu Aruba por a conoce y disfruta di dje.
A pesar di un edad hoben, Carolyn den su prome salida a sa graba tres (3) cancion titula, Niño Chiquito, Inolvidabel Amigo y e Inolvidabel tema titula “WELA”, e tempo ey riba cassette.
Na aña 1992 Marion Maduro como compositor di e cantica “ WELA” a dicidi di graba e cancion un biaha mas, pero na e ocasion aki lo ta riba un compact disk, pa asina sigura e legado y memoria (vivencia) digital di “Wela” y naturalmente un biaha mas den e bos unico di Carolyn Kelly.
Carolyn Kelly a sa na pone su stempel y laga pa nos un legado den e mundo musical di fin di aña door di graba no mas cu diescuater cantica pa Chicas Gaiteras cu a hacie un di e bosnan cu ta identifica Chicas Gaiteras.
Chicas Gaiteras ta conoci pa su temanan cu mensahe profundo cu Carolyn Kelly a sa na transmiti manera un Diva. Carolyn su interpretacionnan hopi biaha a causa lagrima den e publico, pero tambe den e propio agrupacion.
Carolyn cu su bos a sa na interpreta e cancionnan cu emocion cu no por tabata describi cu palabra. Como celebracion di e 25 aña di su manager Marion Maduro, el a sa na contribui cu su bos na e realisacion di un produccion nobo di shete cantica. A pesar cu Chicas Gaiteras a despedi oficialmente di farandula cu un concierto cu hopi ta cataloga como un cierre di broche di oro, Carolyn a keda activo y fiel na Marion como compositor pa e produccionnan nobo. Den cuadro di esaki Carolyn a contribui cu su bos tanto como solista y corista na e Proyecto titula “Pa henter aña.”
Su ultimo grabacion como solista tabata e cantica y videoclip titula “Cancer” dedica na tur cu ta sufri di e malesa feroz aki cu hopi bes ta yega na porta sin avisa.
Carolyn sin duda tabata un integrante yena di hopi amor, dedicacion y pasion pa Chicas Gaiteras.
Carolyn a recorda su temporada den Chicas cu hopi nostalgia, el a soña cu un futuro den Chicas, pero el a biba semper e dia, e momento y e awo di Chicas Gaiteras.
Tin hopi anecdota pa recorda, pero loke semper lo keda den nos mente ta e energia cu Carolyn a sa na transmiti y e gana cu e tin pa biba bida.
Sin duda nos lo haya falta di Carolyn su influencia positivo den nos agrupacion. Pa es motibo aki Chicas Gaiteras lo duna un mini concierto diabierna 9 di juni 2023 na Royal Funeral Home pa celebra y honra nos Carolyn su carera musical. Orario di condolencia ta di 6:00 pm pa 9:00 pm, mientras di 8:00 pa 9:00 pm Chicas Gaiteras tin e mini concierto.
Nos di Chicas Gaiteras ta invita tur fanatico, amigo y conoci pa bin celebra e Bida di nos “Carol Carol Carolina Kelly.” Gone to Soon, But never Forgotten.
