Manera conoci, e apertura di Secrets Resorts na San Nicolas ta planifica pa final di aña aki caminda cu e prome 300 camber lo habri. Pa Otmar Oduber, e ta haya esaki un placer, orguyo y felicidad masha grandi mes pasobra ta un proyecto cu pa hopi aña a traha riba dje. Desde nos Status Aparte tur gobierno a purba na traha hotel na San Nicolas, varios bloki a pone pero lamentablemente nunca por a concretisa esaki. Na 2018 a cuminsa cu negociacionnan cu e grupo desaroyando e proyecto na San Nicolas, anto na 2019 Oduber tabata tin e honor prome cu a retira di politica pa por haci e apertura y percura p’e grupo hotelero serio aki establece su mes na Aruba.
E reto di e pandemia tabata uno grandi, Oduber ta contento cu e desaroyadonan a keda cu Aruba y keda kere den e proyecto. Despues a bini reto riba caso den corte cu a presenta.
“Mi ta sumamente contento cu tempo nos a percura p’e desaroyadonan aki bin Aruba, percura pa tur permiso tabata corectamente duna. Di nan parti nan a percura pa cumpli cu tur condicion poni pa Aruba.”
E tempo ey hasta Banco Central a haci un screening completo, door di VDA tambe, un di e gruponan cu mas a screen prome cu yega Aruba y tur nan a pasa. Awe nos ta papia di un apertura pa un proyecto pa San Nicolas cu Oduber ta enfatisa lo bira un ‘game changer’ p’e comundidad di pariba y pa Aruba completo den loke ta trata economia. Oduber ta bisa cu e tempo ey a haci varios studio, a percura pa di parti Price Waterhouse Coopers como tambe Aruba Investment Bank, haci estudionan riba kico e impacto di esaki lo ta pa San Nicolas y economia di Aruba den su totalidad. Niun hende no ta ni imagina nan mes ainda ki diferencia esaki lo bay haci pa San Nicolas unabes cu e hotel aki ta den operacion. No solamente esnan cu ta bay traha, desaroya nan mes y cumpra den centro di San Nicolas, pero den su totalidade spin-off caminda no tin un car rental of souvenir shop na San Nicolas, ni ningun otro tipo di actividadnan of otronan pariba di nos isla. Unabes e hotel aki habri – cual por cierto ta e prome hotel di e magnitud aki pa San Nicolas, cu esaki lo nifica un cambio completo di e wega segun Oduber. “Aworaki lo haya tur rond creando desaroyo economico, hendenan cu lo bay cumpra na San Nicolas y gasta placa eynan, creando un diferencia grandi den calidad di bida.”
E desaroyo aki no ta kita cu mester bay den man cu hopi otro asunto segun Oduber cu mester tratanan tambe, pero sigur un noticia sumamente positivo cu e resort aki lo tin su apertura. Oduber ta felicita gobierno di Aruba, comunidad di San Nicolas y pueblo di Aruba den general p’e logro aki cual segun su persona ta uno hopi grandi cu lo duna su fruto.
