A bati alarma di candela den Shiribana. Esaki a sosode den careda di 3:00PM ora cu e habitantenan di e area a tuma nota di huma y holor fuerte di candela.
Na yegada di polis a constata berdad cu tabata trata di un candela den un parti poco aparta den mondi, patras di casnan situa den Shiribana y tambe Nuñe. Na sitio por a tuma nota cu e candela tabata creciendo debi na biento fuerte. Esey a lanta preocupacion di e habitantenan cu ta biba cerca.
Brandweer a yega sitio y traha dibiaha cu e candela, cu despues di un rato tabata bou di control.
Testigonan na sitio a indica di a miro dos persona sospecho sali na careda di cual nan a duna descripcion na polis, cu di nan banda a tuma tur detayes.
Segun por a compronde cu mas sigur lo tabata trata di dos adicto ambulante cu lo a haci e acto aki intencionalmente. Un testigo a conta di a purba core nan tras pero no a logra.
Afortunadamente no tabata daño material ni victima envolvi. Un lastima si cu a causa daño na flora y fauna cu un acto sin motibo alguno.
