Ta parce cu ora bo bira grandi na Aruba, ta castiga bo den tur direccion, asina Ivo Valdes, presidente di Organisacion di Pensionado Publico Arubano (OPPA) a vocifera durante un encuentro cu representante di Headlines Group, kende ta e cas editorial di 24ora.com y TREMPAN. Gobernantenan actual ta boca yen cu palabranan manera; integridad, dignidad y paz. Pero, paz pa ken? Valdes ta puntra su mes. Si e pensionado ta pasa hamber henter luna, con por papia di un paz mental?
Te ainda e pensionado ta paga impuesta y hasta AZV. Gobierno ta papia di igualdad pero no ta aplica esaki. E grandi keto bay tin cu contribui na caha di caha di gobierno, despues cu a traha henter su bida pa hiba e pais padilanti.
Ainda den e tapa aki di e pensionado su bida, e ta ricibi tur luna “aanslagen” for di Departamento di Impuesto. Ta entrega “bezwaarschrift” pero no ta ricibi ningun contesta. Y locual ta mas preocupante, ta cu, no por bay reclama ningun caminda pasobra keto bay no tin un ombudsman. Ora papia cu gobernante, semper ta contesta bisando: “si e ta riba agenda.” Pero e realidad segun OPPA, ta cu e no ta riba ningun agenda mirando cu e no ta cumbini nan.
Aruba no ta bayendo dilanti, pueblo tin cu habri su wowonan. “Nos no por sigui tin gobernantenan di e forma aki”, ta locual cu Ivo Valdes di OPPA a vocifera. Na 2021 tabatin eleccion parlamentario, OPPA a sinta cu tur partido politico y vocifira nan punto di preocupacion, p’asina si nan logra drenta gobierno, pa tene cuenta cu OPPA y nan deseo. Entre nan partido RAIZ ta un di e partidonan cu OPPA a sinta cu ne. Pero ta parce cu ainda gobierno su wowo ta cera pa atende cu tema nan, manera entre otro; embeyecimento. E ta un reto social cu tin su consecuencianan y tin cu atende cu ne anto cu urgencia.
