Riba 26 di augustus 1988, Organisacion di Pensionado Publico Aruba (OPPA), a keda funda. E meta di OPPA ta pa trece e grupo di pensionado di gobierno hunto den un organisacion pa defende tur locual cu ta na nan interes y nan bienestar. Ta pa e motibo aki OPPA lo celebra y recorda su 30 aña di existencia cu un fiesta bailabel na Renaissance Convention Center, riba diadomingo dia 26 di augustus 2018.
Fuera di e fiesta bailabel aki, OPPA ta di opinion cu mester percura tambe pa su miembronan keda al dia y haya instruccion y informacion di diferente desaroyo cu ta tumando luga rond di nos.
Alabes OPPA kier yuda facilita y mehora e calidad di bida diario di nos miembronan, tanto mental como fisico. Relaciona cu e pensamento y deseo aki, Comision di Actividad, hunto cu Directiva di OPPA, a prepara un programa durante dos siman cu diferente actividad. Cu cooperacion di varios instancia a traha un programa cu actividad diversifica pa nos miembronan. Entre otro nos miembronan lo haya informacion di uzo di On-line Banking y otro servicionan bancario duna door di, Aruba Bank N.V., CMB y RBC. Otro instancia ta Setar cu lo duna informacion di nan diferente servicionan entre otro e pago On-line, mashin di Self-service ‘Clarita’ y uzo di Smartphone.
Lo tin un demostracion di cushinamento saludabel na YMCA Dakota y alabes, pa cortesia di Oduber & Kan, lo tin un charla tocante malesa di bista y ta bay tin oportunidad pa controla e oido. Oduber Agencies tambe lo patronisa un mainta di informacion tocante un variedad di remedi natural, combina cu un charla di dr. Viana, specificamente pa nos miembronan. E programa aki lo cuminsa riba diamars 14 di augustus y lo culmina cu e fiesta bailabel riba diadomingo 26 di augustus.
Ta p’esey di awo caba OPPA ta pidi su miembronan pa reserva e fechanan di 14 pa 26 di augustus 2018 y entrante diamars 7 di augustus venidero caba e miembronan por pasa inscribi y busca nan carchi na oficina di OPPA pa por participa den e programa di e actividadnan aki. Tambe e carchi pa e fiesta di dia 26 di augustus 2018 lo ta obtenibel completamente gratis pa miembro.
Keda pendiente pa e programa detaya di Hubileo 30 di OPPA.
