Awe a tuma luga e caso di Ophelia Beyde contra di Nelson Speed Andrade. Esaki ta un caso cu Beyde a entama contra Andrade, di cual e no tabata contento pa un relato relaciona cu e caso di Avestruz.
Dia 19 di april Andrade a papia riba e caso di Avestruz den Enfoke 90. Cierto declaracion di cierto sospechosonan a bin afo y Andrade den su funcion como reportero tabata papia riba dje. mr. Demis Illes, abogado di Nelson Andrade, a splica cu den esey a menciona e nomber di Beyde y e no ta di acuerdo. Beyde ta pidi un rectificacion di parti Andrade.
Ningun caso ta facil, segun e abogado. Pero e ta kere cu hues a compronde e punto cu Andrade ta trece dilanti ta cu esaki no ta su palabra. “Esaki no ta un cos cu e ta inventa. Ta cos cu nos sa a wordo papia den caso di Avestruz y ta wordo duna como tal declaracion”, mr. Illes a bisa. Esaki no ta algo cu Andrade a chupa di su duim y trece afo. Esey ta e punto cardinal y a purba trece dilanti.
Awo ta laga hues tuma su decision. Si e ta haya toch cu a actua nechi suficiente of mester a haci e stapnan mas prome. Hues a indica dicon no a yama e persona y puntr’e pa su opinion, aunke berdad ta esey no lo a cambia mucho. Pasobra por a spera cu e persona simplemente lo a nenga y esey ta esencia di e caso.
Si a yama puntra kico su argumento lo ta, e contra partido lo bisa ta “loke a bisa no ta berdad”. “Awo no ta na nos pa husga si ta berdad of no loke Speed a haci”, el a bisa. Andrade como reportero a trece dilanti loke a bisa. Kiermen no ta na dje pa investiga kico ta bisa na dje ta berdad of no. Na final di dia eigenlijk esaki ta cay bou di trabou di un reportero pa yama e persona y puntr’e su opinion. Pero mirando kico e contenido ta, e acontecimento y kico a bisa, ta duidelijk tambe cu e otro persona lo nenga. No ta spera nada otro p’e ta bay admiti algo asina. Lo dicta sentencia dia 23 di juni proximo.
