Recientemente hues a tuma un decision relaciona cu un caso cu curator, abogado mr. Jean de Cuba, miho conoci como “Jeannot”, a entama den corte na Aruba. Por corda cu e curator ta encarga cu administra, bende y reparti e herencia di La Linda pero despues tambe di defunto Haim Hochman.
E ta un storia largo di pelea familiar di e yiunan di Anna Hochman, doño di e imperio La Linda. E cuater yiunan cu a keda atras a start un pelea cu despues di hopi aña, ainda no tin fin di caba di parti e herencia di como 80 miyon florin cu a keda atras. Ta parce awor cu, despues di morto di mayoria yiu di Anna, cu awo e nietonan a opta pa sigui cu e guera aki.
E procedura aki a cuminsa na comienso di aña na momento cu curator Jeannot de Cuba a haci un peticion na corte pa declara e compania Shanlin Ventures Inc. den bancarota. Shanlin Ventures no ta un compania registra na Aruba, sinembargo, e ta haci tur tipo di negoshi aki. Inicialmente e tabata registra na St. Kitts & Nevis pero ultimo por a compronde cu a saca e nomber for di e registro eynan tambe.
Pakico De Cuba kier declar’e bancarota aki na Aruba, ta pasobra cu mientras e ta inscribi formalmente na St. Kitts & Nevis pa simplemente uza un adres unda e corespondencianan ta bay, pero ta aki na Aruba e ta opera diferente negoshi bao di e nomber aki, cu ta forma parti di e herencia di Haim Rudolf Hochman. E ultimo aki tabata maneha e imperio di La Linda pa su mama defunto. E testament di e mama tabata bisa cu e mester a administra y bende tur e propiedadnan y parti cu su rumannan, pero el a opta pa no haci esey. Al contrario, a purba sconde tur e propiedad y placa via diferente construccion di negoshi “offshore” of a habri cuentanan di banco tur rond di mundo.
A ENTREGA KEHO
Omaira Britten, famia y representante di e herederonan di Haim Rudolf Hochman, a comenta despues cu el a sali for di sala di corte, cu e caso cu famia Hochman tabata un obhecion na Raad van Toezicht. Diabierna a bin cu cuater hues fo’i Corsou. Nan tabata esunnan cu a haci videocall cu nan riba e caso di La Linda. A pidi specificamente riba e keho. E keho tabata cu nan a manda un keho contra curator Jeannot de Cuba y ex-hues Willem-Jan Noordhuizen, cu ta persiguiendo e yiunan di Hochman. Loke nan ta pidi tur es tempo cu ta bay bin na corte, ta pa nan trek in nan probeet. Sin e probeet, nan no por haci nada, ni na Sint Kitts, ni na Panama.
Ultimo biaha Britten a bisa cu tin un ley internacional y ta violando esaki. Ta bin cu ta bay uza Arubaanse recht. Si ta uza un Arubaanse Recht, e ora cu Panama y Sint Kitts manda nan hues pa dicta un caso na Aruba contra di loke ta nan propiedad, ta gobierno ta bay cay aden. Aki ta unda e wega lo bay hunga, cual t’e pueblo t’esun cu ta bay ta masacra un biaha mas cu placa cu no tabatin nodo.
Segun Britten, e herederonan tin tur e derecho. Mescos cu de Cuba kier a pone borchi tur caminda pa bende, a kita tur borchi di Century 21 y Bon Cas, pasobra e borchinan ey ta riba propiedad di nan, cu ta pertenece na St. Kitts y Panama y no por bende nan.
KIER UN FINAL
Britten a menciona cu e famia kier un final. Pa ocho aña largo Jeannot de Cuba tabata curator y no a haci nada. E tabatin e deber como curator di bende propiedad di Anna Hochman-Britten y no propiedad di Haime. De Cuba a mescla nan pa e por enrikece y bira miyonario. Eynan t’e punto cu e famia a bisa bon cla diabierna dilanti di e cuater huesnan fo’i Corsou.
“Bo no por bay coy placa cu no ta di bo. Placa ta yora nan doño. Mañan lo bo haya bo den cataclismo.” Britten a pidi un biaha pa bay den un debate, p’asina De Cuba mustra pueblo henter. Britten a papia no den nomber di famia Hochman, sino den nomber di pueblo di Aruba, pasobra si tin un offshore account, mester tin cuidao cu ne, pasobra pafo lo haya e Arubaanse recht cu e ex-huesnan y huesnan lo bay uza pa kita tur cos di e herederonan aki.
“E muchanan aki no tin bida. Nan tin tur cos den beslag.” Un hende cu tin tur cos den nan man cu nan a hered’e di e forsa di e trabao di nan tata, aworaki ta cay pa bira pober pasobra cu un otro hende ta bira rico sin a traha pa loke e tin aworaki, Britten a menciona.
PROCEDURA
Abogado John Zara, representando e herederonan den corte, el a menciona cu Aaron y Bila Hochman a pidi p’e ta nan abogado den e caso aki for di awo padilanti. Aaron y Bila Hochman, por medio di Omaira Britten, a entrega un keho contra di curator Jeannot de Cuba. Tur loke cu Britten a bisa ta cu ta actua en pugna cu articulo 6 di tratado di Roma, o sea aki constantemente tin caso di ‘oneerlijk process’ contra di Aaron y Bila Hochman.
E problema ta cu supuestamente e curator ta pensa cu loke tin na St. Kitts y Nevis, ta pertenece of tin di bay den e boedel failliet di Haim Hochman. Pero Zara ta pensa cu esey no t’e caso. Desde tempo di Anna Hochman, a pone hopi ‘vermogen’ den trust, hustamente pa proteha nan. Esey t’e idea di trust. Pa proteha Nan.
Pa mas detaye lesa TREMPAN.
