Bijbel ta siña cu e unico cos cu nos tin di odia ta pica, maldad y inhusticia, pasobra si nos ta apoya eseynan nos ta cana den scuridad. Ningun mayor por dirigi su hogar cu un curason yen di falta di pordon, amargura y odio, pasobra Philipensenan capitulo 4 vers 8 ta bisa; Finalmente rumannan tur loke ta berdadero, tur loke ta honorabel, tur loke ta husto, tur loke ta puro, tur loke ta bunita, tur loke ta di bon fama, si tin algun virtud y si tin algo digno di alabansa laga esakinan ocupa boso mente.
Caminda tin odio no tin adelanto, tur dia nos ta keda papia di cosnan bieu, pasobra ta esey odio ta y odio ta pone hende wak atras y draai den e wiel di scuridad, pasobra caminda tin falta di reconciliacion, no tin comunicacion ni tampoco amor pa prohimo. Solamente sed di vengansa y demostracion di poder carnal, pasobra odio y falta di pordon ta kibra nos relacion cu Dios.
Dios ta spierta nos di hopi forma pa no yena nos curason cu amargura y tene hende na curason, pasobra no tin beneficio di ningun tipo ora nos ta participa den esey. Ora bo curason ta amarga bo mes ta kibra bo hogar, pasobra bo kier eherce dominio riba hende, cual ta algo cu Dios no ta aproba. Lesa Genesis Capitulo 1 vers 26+27+28 den cual ta skirbi cu Dios a duna hende dominio riba animal, parha, pisca y tur locual ta lastra riba tera. Ningun momento Dios a duna hende poder pa domina hende.
1 Juan Capitulo 4 vers 19+20 ta bisa: Nos ta stima , pasobra e a stima nos prome,si un hende bisa: Mi ta stima Dios y ta odia su ruman, e ta un gañado, pasobra esun cu no ta stima su ruman cu e a mira no por stima Dios kende e no a mira. Esun cu bisa e ta den luz y sinembargo ta odia su ruman ta den scuridad ainda. Ma esun cu ta odia su ruman ta den scuridad y e no sa na unda e ta bay, pasobra scuridad ta ciega su wowonan. Aki ta keda demostra dicon no tin adelanto y hopia biaha un hende por pensa cu ta otro ta contra dje y ta stroba locual cu e kier logra, pero ta e scuridad di su odio ta blokia su vision, pasobra su comunicacion cu Dios a tranca asina cu odio a domina su curason.
1 Juan Capitulo 3 vers 14+15 ta bisa: Nos tur sa cu nos a pasa di morto pa bida, pasobra nos ta stima e rumannan. Esun cu no ta stima ta permanece den morto. Ken cu ta odia su ruman ta un matado y boso sa cu ningun matado tin bida eterno ta permanece den dje.
Tur hende ta cosecha locual cu nan a sembra y ta tristo ora nos ta nota caminda ruman y ruman ta odia otro pa motibo di odio y division cu mayor a sembra (Genesis 37 v 3+4+5). Infieldad ta laga un famia akibanda sin pariba ni pabou y bay forma un otro famia aya banda, caminda e nan si ta bon cuida, esey ta trece falta di pordon, amargura y odio. Proverbio 8 vers 18 Señor ta bisa: Rikesa y honor ta cerca Mi. Rikesa berdadero y husticia. Ta tempo pa stop di odia y busca cara di Dios, pasobra Dios ta amor. Pastoor Marcel Balootje
