Screening di e ocho persona cu ta bay bira e siguiente ministernan di Gabinete mr. Evelyn Wever-Croes II ta cla. Gobernador di Aruba, Su Excelencia Alfonso Boekhoudt a acepta nan y esey kiermen e formacion dje siguiente gobierno ta cla.
Den luna di juni tabata tin e eleccion y a tuma 76 dia pa por a yega na formacion di gobierno. Formado di gobierno a tene diferente reunion cu stakeholder. Na dos ocasion MEP y RAIZ a firma acuerdo y awo nan ta cla pa goberna Aruba.
E formacion ta como siguiente:
· Evelyna C. Wever-Croes; minister di Asunto General, Innovacion, Organisacion Gubernamental, Infrastructura y Planificacion Teritorial, alabes minister presidente;
· Geoffrey B. Wever; minister di Asunto Economico, Comunicacion y Desaroyo Sostenibel;
· Ursell M. Arends; minister di Integridad, Naturalesa, Transporte y Cuido di Grandinan y ta vice-prome minister:
· Xiomara J. Maduro; minister di Finansas y Cultura pero ta e di dos vice-prome minister;
· Rocco G. Tjon; minister di Husticia y Asuntonan Social;
· Glenbert F. Croes; minister di Labor, Integracion y Energia;
· Danguillaume P. Oduber; minister di Salud Publico y Turismo;
· Jan H. “Endy” Croes; minister di Enseñansa y Deporte.
Prome minister demisionario mr. Evelyn Wever-Croes a informa durante e rueda di prensa cu Guilfred Besaril un biaha mas t’e minister plenipotenciario na Hulanda. Pa loke ta e posicion di Vanessa Kock-Tjon como altocomisario di Cuerpo Policial Aruba (KPA) y pa evita conflicto interes, segun Wever-Croes, el a hala di su posicion temporalmente. Bisando esaki Kock-Tjon ta bay traha den otro posicion durante e gobernacion aki.
Ken ta bay bira e siguiente parlamentarionan di MEP esaki no ta conoci ainda, pero ta finalisando esaki. Ursell Arends a informa e dos candidatonan cu ta bay bira parlamentario di RAIZ ta Raymicheline Raymond y Raymond Kamperveen. E siguiente stap ta cu e proximo ocho ministernan tin di entrega nan retiro. Prome cu nan por huramenta como minister, mester warda p’e ocho siguiente parlamentarionan huramenta.
Pa cobertura mas amplio, lesa e edicion di TREMPAN mañan.
