Hues Comisario hunto cu su team, RST y funcionarionan di Ministerio Publico (OM) for di mainta nan ta drenta y sali di cas of oficinanan cu ta sospecha tin algo di haber cu e caso Avestruz. E ta investigacion riba otorgamento di terenonan di Gobierno, durante cual a comete soborno of falsificacion di documento, y den algun caso labamento di placa, segun e documento cu OM a entrega na e diferente personanan.
E mas ultimo entrada a tuma luga na oficina di The Village, di e comerciante Neme, na kende su cas un rato prome tabatin un inval na Palm Beach. E team di Avestruz,consistiendo tambe di funcionarionan di Hulanda, a bandona e sitio cu caha cu documentonan confisca y a bandona e sitio den e mas cu cinco autonan di huur cu a wordo uza.
For di mainta tempran a cuminsa cu entradanan hudicial, bayendo prome na cas di ex Minister di Infrastructura, y asina despues a sigui pa Leoncita Arends; Gaby Werleman; Freddy Every; Fast Delivery; Oficina politico di Benny Sevinger; cas di Neme den Bachstraat; cas di Neme na Palm Beach y oficina di Neme na The Village. Pues en total 9 entrada hudicial for di 7’or di mainta te cu 4.30 di atardi guia pa Fiscal mr. Pronk y Hues Comisario mr. Sap, den combinacion cu funcionarionan di Landsrecherche y RST. Tambe a haya ayudo di funcionarionan di Hulanda, mirando e cantidad di personal necesario pa haci tur e trabou aki.
OM
Ministerio Publico te den oranan di atardi a saca un comunicado informando cu Landsrecherche conhuntamente cu hues-comisario y den cooperacion cu Cuerpo Policial di Aruba, a tene entrada hudicial na diferente luga.
E entradanan aki a tuma luga den cuadro di un investigacion penal di Landsrecherche na posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: e investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di Pais Aruba den e añanan 2009 te 2017. Ademas ta investiga e rol di un minister anterior den esaki.
Cu sosten di Landsrecherche Curasoleño a tene tambe un huiszoeking na Curaçao den cuadro di e investigacion. Den e huiszoekingnan documentonan y computernan a wordo tuma den beslag. Pa awor no a haci ningun detencion y lo no duna mas comentario. Y ta bisa cu e den e simannan venidero e team di investigacion lo entre otro, analisa e contenido di e administracion, e computernan, y sigui pa scucha sospechosonan y testigonan. E investigacion ta ainda den un fase inicial.
