Naamloze Vennootschap Electriciteit-Maatschappij Aruba “ELMAR” ta informa clientenan den area di Tanki Leendert te cu Noord, cu lo realisa trabou di mantencion riba e instalacion aki na e Onderstation di Tanki Leendert. Ey ta responsabel pa distribui coriente na e areanan aki.
E trabou di mantencion aki lo cuminsa dialuna awo dia 19 di juni y lo caba riba dialuna dia 26 di juni 2023. Pues, durante henter un siman lo percura pa mantene e onderstation.
Ta trata aki di un trabou di mantencion preventivo, pa garantisa stabilidad di e grid di coriente, promoviendo continuidad di suministro di coriente den e area.
Regularmente ELMAR ta realisa trabou di mantencion sin interumpi suministro di coriente, manera esun aki. Ta transferi e carga pa sigui distribui coriente na e area por medio di un otro stacion pa evita interupcion di servicio di coriente (shutdowns) pa clientenan.
Sinembargo, e proceso aki ta pone un esfuerso adicional riba e kabelnan di e otro stacion. E tecniconan lo monitoria e situacion aki durante henter e periodo menciona.
