Nubia di shinishi volcanico no tin ningun riesgo pa Aruba

Volcan La Soufriere ta den noticia un biaha mas. Algun siman pasa e volcan aki cu ta keda na St. Vincent a drenta den erupcion, caminda cu mester a evacua varios habitante pa otro islanan den vecindario. E miedo cu tabatin no solamente den e area, pero tambe riba e islanan ABC, cu e shinishi volcanico lo mester a yega, pero esey no a pasa. Desde ayera, un biaha mas, e volcan a bolbe drenta den erupcion.

Dave Barkmeyer, director interino di Departamento Meteorologico (DMA), a splica cu ayera tardi tabatin un erupcion atrobe. E volcan aki ta den un estado di inkietud (state of unrest). A base di esaki, el a expulsa un nubia di shinishi volcanico den atmosfera. E Volcanic Ash Advisory Center di Washington a saca algun mapa di pronostico cu ta bisa cu un parti di e as aki lo pasa noord di e islanan ABC, den curso di awe merdia.

Despues di esaki no ta mira nada mas den nos direccion. Pa 2:30 di marduga di mañan diamars, no ta mira nada mas. Esey ta basa riba loke tabatin ayera. A base di esaki tambe Corsou a saca un segmento cu ta dedica pa aviacion y no pa publico.

Nubia di shinishi volcanico no tin ningun riesgo pa Aruba

Nubia di shinishi volcanico no tin ningun riesgo pa ArubaClick e link pa mas: https://24ora.news/3goEL9S

Posted by 24ora on Monday, April 19, 2021

Corsou te ainda ta responsabel pa FIR (Flight Information Region), caminda cu Aruba ta cay aden. Nan a saca un Segmento cu ta valido te cu 2:35 di merdia. E segmento aki ta bisa tambe cu por spera nubia di shinishi volcanico, pero panort di nos islanan.

Den otro palabra, mayoria di e companianan ta opera normal. Mayoria di e aerolineanan ta bulando normal. Si nan mantene un plan di vuelo cu ta keda leu for di e nubia di shinishi volcanico, no ta mira pakico mester suspende vuelo. Ora cu e avionnan subi bay nort, nan ta pasa 10 pa 20 mil pia riba e nubia. E jetnan ta riba 30 pa 40 mil pia nan ta bula. E nubia aki no ta afecta nan pa nada. General Aviation cu ta bula rond di 10 mil pia si mester tene cuenta cu esaki.

Si e pasa mes e nubia lo ta hopi fini. E riesgo den atmosfera minimo. Riesgo semper tin. Pero si mantene na loke a pronostica, sea ta evita e area aki nort di Aruba of pas’e su dilanti bay, cual ta mas safe, no tin ningun clase di problema, Barkmeyer a bisa por ultimo.