Pa algun tempo caba, e tabata luchando cu su salud, un mucha homber di Socotoro, kende a bira grandi hungando pa e ekipo di RCA, cu cual ekipo el a logra di titula campeon di Aruba.
Nolly manera cu tur hende semper a conoce, tabatin un personahe hopi alegre, hende di tur hende y hopi respeta cu esunnan cu a conoce su persona y hasta pa esunnan cu no a pasa bon na su man como defensa den e ekipo tricolor.
RCA cu diasabra anochi a logra su di 34 titulo di campeon di Aruba di e division mas halto di futbol, a perde un persona cu ta parti di e historia grandi di e ekipo di Solito, formando parti di un grupo di “hobennan” cu a carga e ekipo aki den un periodo dificil.
Un personahe di un estatura masha cortico mes, Nolly su habilidadnan fisico y tecnico, a converti su persona den un asina yama “all arounder” hungando e posicion cu trainernan a pidi pa e hunga, sea como delantero, den medio campo y den e parti final di su carera, como sea defensa central of marcado di punta. Nolly semper a cumpli, semper a lucha for di comienso te fin pa su ekipo, pa su coleganan di ekipo, tanto den campeonatonan local como internacional, formando parti di seleccion di Aruba na varios ocasion.
Cu su estatura cortico cu pa hopi lo ta un handicap den e deporte di futbol, Nolly a impresiona tur hende pa su habilidad di bula mas halto contra hungadonan cu tin estatura mucho mas halto cu su persona, semper saliendo vencedor.
Un persona cu despues di a stop di hunga den campeonato regular, a hunga pa hopi aña den division di veterano, combina cu su trabou como masahista tanto pa ekiponan di Hoofdklas pero tambe biahando na cantidad di ocasion cu e seleccion nacional pa diferente pais.
Tur hende cu tin Nolly como amigo, cu conoce e ser humano aki di cerca, a conoce un persona humilde pero alegre, luchado pero tambe hopi amabel y pa hopi e tabata conoci pa ta un luchado riba tereno na tur momento.
Ultimo añanan Nolly a wordo confronta pa un periodo dificil tanto pa su mes como pa su famia, sufriendo di Alzheimer algo cu a inicia for di tempo cu ainda e tabata activo como masahista pa ekiponan di futbol.
Su bida riba e mundo aki a termina net tres dia despues cu su ekipo preferi, esta RCA a titula campeon di division di Honor, dunando e impresion cu Nolly a wanta duro pa bay sosega cu e trofeo di campeon!
Nolly a yuda hopi aña den Cuerpo Policial principalmente na scol di polis, pa cual hasta pafo di su ora di trabou tabata yuda e polisnan.
