Hopi biaha nos ta puntra nos mes, ta na unda hobennan ta sali cu un comportacion vengativo, of ki dia hende grandi ta stop di venga y persigi otro, pasobra ta bisto pa tur hende cu den esunto di paga malo, cu malo, y venga otro, no tin ganashi, nos tur ta perde pasobra Dios no ta den e asunto, Dios kier pa nos stima otro mescos cu Dios ta stima nos.
Nunca paga malo cu malo na ningun hende. Respeta locual ta corecto den bista di tur hende.(Romanonan 12:17).
Ta tristo pa mira hende grandi sabi, expresa tur tipo di fingimento y dos cara, rabia y vengansa, mientras cu e hobennan ta copia actuacion di esnan cu mester duna ehempel y hopi biaha e personnan ey ta nan propio mayornan. Concomber na boca di mucha ta hende grandi a pone y no ta tur cos robes ta bin di internet.
Di unda mal actitud ta bini? E ta bini for di mal pensamento y duda cu diabel ta pone den mente di hende.( Santiago 3:14-15). Dios no ta duna ningun hende mal pensamento y mal actitud pa haci malo cu otro. Pasobra manera un hende ta pensa asina e ta. ( Proverbionan 23:7).
P’esey nos mester tene bon cuenta, kico nos ta pensa y papia di otro hende pa maldad no domina nos curason. ( Proverbionan 4:23).
Mal pensamento y mal actitud ta causante di morto y cuanto hende no a muri of ta cera pa e motibo ey ( 1 John 3:15-16).
Mal pensamento y mal actitud ta causa di adulterio of miho bisa kiebro di matrimonio ( Hebreonan 13:4).
Mal pensamento y mal actitud ta causa di fornicacion y sigui avansa den abuso sexual. (1Thesalonisenses Capitulo 4:3+4+5).
Mal pensamento y mal actitud ta causa di ladronicia, inmoralidad, atraco, pensamento cu ta desea algo pero no kier traha limpi y decente pa yega na dje.( Efesionan 4:28).
Mal pensamento y mal actitud ta produci testigo falso, lenga mentiroso ( Proverbionan 6 :16-18).
Mal pensamento y mal actitud ta pone hende papia blasfemia ( Judas 1:10).
Laga nos tene cuenta cu mal pensamento y mal actitud no ta atractivo.
Mal actitud ta haci dolor na bo sernan keri.
Mal actitud ta horta bo felicidad. ( Nos ta mira esaki ora di violencia domestico).
Cu mal acitud bo no por trece ningun hende riba e caminda di Dios.
Tin actitud /pensamento robes den nos bida cu Dios kier pa nos laga los:
Cabesura, of capricho. Negativismo. Orguyo. Falta di pordon. Busca fout di otro.( Romanonan 14:13).
Mientras cu e cosnan aki ta permanece den bida di hende, scuridad tambe tey.
Tene cuidou rumannan pa no tin den ningun di boso un curason malbado y incredulo, door di aleha for di e Dios bibo.( Hebreonan 3:13)
Mira pa ningun no keda sin alcansa e gracia di Dios, pa ningun reis di amargura no spreit y causa problema y door di esaki hopi wordo contamina ( Hebreonan 12:15).
Nos ta bibando den tempo trabahoso y ta p’esey awor mas cu nunca nos tin cu duna e miho ehempel na nos hubentud, nos tin di pensa dos biaha prome cu papia y tres biaha prome cu actua.
No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento,pa esaki por duna gracia na esnan cu ta tende. (Efesionan 4:29)
Laga nos usa nos autoridad pa edificacion y no pa destruccion.
Sinceramente Pastor Marcel Balootje.