Recientemente a sali den prensa un decision cu minister di salubridad kier scapa placa door di saca fisioterapia for di e pakete di AZV of bin cu un ‘eigenbijdrage’. Asociacion di Fisioterapistanan di Aruba (AVF) no ta di acuerdo cu ne.
Segun presidente di e asociacion, Marlon Maduro. nan ta considera di ta un stakeholder importante, pero ningun dia a haya oido. Nan a hasta mand’un carta cu varios pregunta pa e minister y e demas partidonan, pero no a haya ningun contesta.
Maduro ta agrega cu AVF a haci nan investigacion tambe riba con e gastonan di fisioterapia tabata den e ultimo cinco añanan for di e website di AZV mes y a bay riba nan presupuesto. Aki ta mustra cu e gastonan tabata practicamente presupuesta na 5 miyon. Den aña 2018 tabata e unico aña cu a subi un tiki riba dje.
Nunca nan presupuesto a pasa 6 miyon. E tarifa di e fisioterapistanan ta uno fiho. Nan tin un limite pa aña segun Maduro. Tanto tratamento nan ta duna pa aña, cu ta costa tanto. Tarifa pa tratamento na cas ta tiki mas halto, pero e ta bay den e 3210 tratamento cu por duna pa aña. E ta inclui cu sa precisamente casi cu e 5 miyon no ta pasa riba dje.
Den e ultimo 2 añanan tabatin mas cambio den e tarifanan, cual tabata bisto. Maduro a comenta cu pa aña 2020 (e aña di pandemia), cu e placa uza pa fisioterapia a baha. Tabatin algun colega cu a baha cu pensioen. AZV, door di tur e problemanan financiero no a yena e vacaturanan.
E acuerdo tabata cu ora un fisioterapista baha cu pensioen, ta duna otro cu ta riba lista un chens pa cuminsa cu su praktijk, pa e tambe por yuda pickup tur lista di espera cu tin awor aki. E fisioterapistanan por haci mas door cu nan tin un limite pa aña. Por mira cu hasta pa 2020 e tarifa di 5 miyon a baha pa 4.8 miyon. No a yena e luganan habri y hopi di e fisioterapistanan no a traha pa motibo di e pandemia. No a gasta mas placa den cinco aña.
Pa cobertura mas amplio lesa edicion di TREMPAN mañan.
