Caso di atraco falso registra. Algun siman pasa riba un diahuebs anochi banda di 8:00PM a drenta informe riba otro caso di atraco den vecindario di Shellstraat. E dama a bay den casino na Playa. Eynan el a hunga y gana placa. E premio cu el a gana den casino el a perde pafo caminda pa cas. Dos homber cara tapa cu cuchiu den man a sigui e dama y dado momento bou menasa exigi pa e entrega e placa.
Den Avenida Alo Tromp a logra bati alarma y polis a yega mesora. Polis a tuma datos di e victima y cuminsa cu un investigacion. E dama a splica cu e atracadonan despues di kita su placa a exigi pa e sigui cana.
Awe vocero di polis, Lito Lacle a manda informacion oficial pa prensa cu e caso aki ta trata di un denuncia falso. Na ningun momento un atraco a tuma luga. Team di polis encarga cu atraco despues di tuma tur datos, despues di interogacion serio, a confronta e señora cu locual tabata conclucion di investigacion.
E señora a bin admiti cu el a inventa e storia. E tabata un denuncia falso cu el a pone. Despues di a tuma su declaracion como sospechoso, ministerio publico a lag’e den libertad.
Pa Cuerpo Policial por resolve mas caso cooperacion y informacion di pueblo di Aruba ta hopi importante pesey nos ta pidi si bo tin cualkier informacion, pa yama nos tiplijn: 11141. Anonimato ta garantisa.
