Diabierna mainta durante conferencia di prensa di WEB riba e Brown Out cu a sosode diahuebs atardi, nos a puntra director interino di WEB, Veromar Werleman si locual a sosode ayera tabata algo di haber cu falta di mantencion, of ta algo otro.
Locual a sosode diahuebs atardi segun WEB no ta kere ta falta di mantencion. Pero locual si nan tin den nan proceso segun Werleman ta cu lo haci un Route Cause Analysis pa haya sa detayadamente kico lo por tabata e causa di esey anto bin cu un recomendacion pa remedia esaki. “Locual si nos por bisa ta cu e transformernan aki ta anticua y nos tin plan pa cambia nan den e añanan cu ta bini.”
Werleman ta splica cu e areanan afecta tabata Palm Beach, Noord, Balashi, Parkietenbos, Santa Cruz, Savaneta, Pos Chikito y San Nicolas. Nos a puntra tambe mirando cu a soluciona e problema rapidamente, pero e pregunta ta bira si tanten no reemplasa e transformernan ‘anticua’ aki, kico ta e chens cu por bini un ripiticion di loke a sosode ayera.
“P’esey tambe nos a tarda un tiki. Nos a busca e causa y isola esaki pa percura cu ora suministra bek pa no tin e mesun problemanan cu esaki a trece na prome instante.”
WEB a publica un post riba nan Facebook caminda nan a pidi comunidad sorry p’e interupcion di coriente aki. Varios tabata e comentarionan cu por a lesa di diferente hende cu a keha di aparatonan cu a daña manera microwave, of comestibelnan tambe cu lo mester a daña.
Apesar toch cu nan a recupera suministro di coriente bastante lihe, y hopi hende a keda contento cu esaki, ainda tin varios hende den comunidad cu sin embargo a sigui na cherca WEB y su maneho. “A para bira tur luna den tur aña coriente ta bay, nos a bira Venezuela?” Ta un di e varios comentarionan cu hendenan a los bao di e publicacion di WEB riba rednan social.
