Brenda Maria Robles a keda boca habri pa e reaccionnan di un LIVE cu el a mira riba 24ora.com. Tabata un entrevista riba abuso di muchanan. El a sinti un falta di comprension di parti ciudadanonan pa e tipo di casonan aki.
Brenda a sinti cu a yega momento pa divulga su storia pa e hendenan haya sa kico ta un pedofil of acto di pedofilia. Hiba e victima den un tratamento, no ta e unico solucion.
E mes tabata victima di un pedofil for di su 7 te cu su 12 aña. Tristo di e hecho aki ta cu su mesun omo a comete e acto, ruman homber di su mama, esta Joy Kock.
Su pesadiya a cuminsa na momento cu e mester a bay biba na cas di su wela. “E prome dia cu mi a drenta e cas ey tabata e cas di teror pami. Mi tabata biba cosnan cu no por imagina cu un mucha ta pasa aden. Maltrato y abuso den tur sentido. Mi tin añas ta biba cu hopi trauma y cada bes cu e abusonan tuma luga, bo ta crece scucha nan ta bisabo “cera boca”. Bo no tin nad’i bisa sino boso tur ta bay riba caya. Mi no tabata kier pa nos keda riba caya.
Joy Kock a destrui mi bida. Mi tabata biba pafo cu un cacho cu tabata mara na un cabuya. Mi no tabata mag di sinta na mesa come. Ainda e ta den mi memoria, con mi mama a traha un conchi papa pone na mesa pasobra el a bisa ta basta. El a lanta e mesa cu tur cos bentami abou cu e mesa pa e simpel hecho pa mi color y pasobra mi ta parce mi tata. Mi tata a laga mi mama y a duna mi mama mal bida. Ki culpa ami tin cu ami ta e unico yiu di mi tata cu a sali pa mi tata Bubu Bislick?”
P’esey como victima e ta bisa cu Richi Danies tin razon, castigo pa pedofil na Aruba y mundo henter no ta bale la pena e poco añanan cu nan ta duna. Hopi hende ta mir’e como un bon hende, pero nan no sa pakico e t’asina. “Mi ta gusta duna locual ami nunca a ricibi. Mi ta saca man pa yuda sin interes. Pero niun hende ta puntra con bo ta drumi anochi. Cada biaha mi ta bisa awo si mi ta bay lubida, awo si mi ta bay sake di mi mente. Pero e no ta berdad. E ta e pesadiya di mas grandi pa cualkier mucha of persona. Pa un mucha ta hopi dolor y no tin castigo.”
E ta admiti cu el a tarda pero e no a logra di sac’e prome. Su conseho ta pa cuida e muchanan na cas, pasobra e hende cu kisas mas bo ta confia, por tin maldad. Y no ta hende homber so, pero hende muhe tambe mester tene cuidao cu nan. “No confia, ni famia. Pedofilnan ta cana cu bachi bisti, ta drenta misa y ta papia di Dios, nan tin fama.
Nan ta sconde pa desgracia bida di criaturanan, manera a sosode cu mi y te dia di awe mi ta biba constantemente cu mi pasado. No tin pildo ni tratamento. Esaki ta e prome stap cu mi ta dal cu mi 64 aña pa mi yega na recuperacion. Prome cu Dios tumami mi kier sintimi liber. No ta importami kico famia ta papia. Mi ta puntra nan unda boso a keda e tempo ey. Mi a crece pensando cu mi ta e imperfecto. Esey pedofilnan ta haci cu bo.”
Brenda ta haya ayudo di psikiatra, cu ta dun’e guia pero e no ta cla ainda. E por pasa lunanan largo cera den camber. Mi luga di trankilidad ta mi camber. E cos ta den mi cabes y mi ta explota lihe. Dokter a bisami cu mi a biba cu tur e angustia y rabia pareu y nunca mi a haya tratamento, ta hacimi asina.
“Mi ta wak Richie su lucha y mi a bisa ta basta. Shonnan cuminsa menciona nomber, saca nan nomber ya cu esey ta e prome paso. No bisa cu ta un famia, pero duna nomber y fam. Di mi ta Joy Kock, un homber famoso cu a destrui mi bida te cu dia di awe. Ohala e por mira e entrevista aki pasobra no ta di mi so el a abusa, pero di mi primonan tambe. Nan a fayece y ami ta unico cu a keda na bida. Pa e tin paz y curason, e tin cu yamami y pidimi pordon.”
Pesey e lo ta presente pa e manifestacion di dia 30 di september hunto cu Richie Danies.
