Manera anticipa, e echo cu departamentonan di gobierno y Gabinete Wever-Croes II a warda pa e holoshi marca 5 pa 12 pa e ora numa busca sosten di un base amplio, tanto politico como di gremio, pa introduccion di cobransa di e impuesto BBO pero awo na frontera, awo ta resulta cu no a keda cla y consecuentemente no por cuminsa diasabra awo.
Gobierno ta premira di cobra 50 miyon florin for di economia di nos pais, via e cobransa di BBO na frontera. Pero pa por logra esey, mester pasa un ley den Parlamento. Lo ta dos ley, un pa BBO na frontera y otro ta cambio den e ley di importacion. Ey gobierno lo haya 4 miyon menos den caha pero cu BBO na frontera ta gana 54 miyon, cu na final lo conduci na tin 50 miyon extra den caha di Gobierno di Aruba.
Aunke a papia di introduci e reforma fiscal pa dia 1 di januari, a cambie pa di juni, a bolbe cambie pa 1 di juli y e siman aki Minister di Finansa y Cultura, mr. Xiomara Maduro, a anuncia cu e ta kere cu lo introduci e medida aki awo dia 1 di augustus.
E mandatario a hustifica cu a bin tardansa pa motibo cu gobierno a purba acomoda e gremionan. Tambe ta pendiente di Raad van Advies, preguntanan di Parlamento cu mester contesta prome y pa despues pasa e ley. Loke no ta mencionando ta cu no tin mayoria na e momentonan aki, debi na ausencia di Setty Christaans, pa motibo di salud. Lo mester depende di un voto di oposicion pa pasa e medidanan aki contra pueblo, loke cu ta dificil pa haya awo. Pues sea ta warda e parlamentario cura y bin traha bek of ta pusha un otro hende pa drenta Parlamento turesten.
Expertonan ta sigura cu e lo bira dificil pa pasa un ley pa introduci un reforma fiscal asina sin mas na augustus of september. Ta kere maa cu gobierno ta keda cumpra tempo pa despues bisa cu lo cambia e ley pa dia 1 di januari 2024, cu tur consecuencia cu esey lo trece cu ne pa presupuesto di pais Aruba. De facto, tur conseho ta pa bin cu BTW, pues e ora miho wanta e BBO na frontera y pasa BTW e ora na januari.
