Un wela di edad respeta a conoce cel di polis sin spera. El a bay defende su mes un biaha mas contra un nieta sin respet. Pa algun tempo caba, segun famia, e señora wela ta wantando tur tipo di abuso den e cas den Mamoticastraat. E nieta tin tres yiu cu dos diferente tata. E ta un mama soltera y ta biba cu e yiunan den e cas di e wela. E cas ta di e wela y ta riba nomber di e wela.
E mama sa bay traha lagando su yiunan menor di edad atras. E yiu di 12 aña mester cuida esun di 8 y 9 aña. Mas biaha e nieta ta abusa di e wela y e biaha aki den un otro intento di e nieta, e wela a defende su mes. Aparentemente e wela a bay defende su mes c’un arma blanco y a herida e nieta na su cara. A base di esey e nieta a bay denuncia e wela y autoridad a bay over na detene e wela.
E señora den su paña di cas a keda deteni y nan a hib’e warda di recherche. A pasa e proceso di interogacion y djey a ten’e cera den cel na warda di San Nicolas. E famia ta sinti cu e nieta tin su plan. E intencion ta pa haci e bida di e wela imposibel den su mesun cas. Djey purba core cu ne pa e drenta un cas di cuido di grandinan. Un intencion hopi tristo.
E cas ta keda di e wela te ora cu e muri. E nieta no tin respet y cu su comportacion ta dunando un hopi mal ehempel na e yiunan menor bibando den e mesun cas na Mamoticastraat. E solo actuacion di purba keda molestia e wela ta algo cu e autoridadnan mester para keto na dje un rato. E wela a actua na su defensa.
Ta e nieta ta esun cu mester busca un caminda p’e bay y laga e wela biba na paz.
