Manera ya ta conoci, awe mainta durante conferencia di prensa, gobierno di Aruba y Crisisteam a anuncia medida nobo relaciona cu Covid-19. Un di e medidanan nobo anuncia ta cu e gym- y localidadnan di ehericio no por habri p’e proximo dos simannan.
Aljereau Sophia ta propietario di Crossfit Eximious 462 y durante un entrevista exclusivo el a reacciona riba e medida nobo aki. Sophia ta lamenta tipo di anuncio asina, mirando cu semper el a cumpli cu protocolnan den su gym. Awo a haya e noticia tristo cu p’e proximo simannan e no por habri. Crisisteam a menciona cu gym ta un di e klusternan pa e virus, pues sitio di origen. Crisisteam por comproba esaki basa riba asina yama investigacion di fuente (bronnen oderzoek). Pues for di pashentnan mes cu a indica unda tur nan a bishita prome cu a contagia.
Cu e anuncio aki, e mundo di gym y crossfit lo bolbe haya un sla financieramente. Debi cu e luna no cera completo, clientenan no lo bay cumpli cu pagonan y esaki ta afecta e gymnan grandemente.
Den caso di Crossfit Eximious, nan ta bezig cu un evento yama Crossfit Open y awe nan mester a finalis’e den un otro forma. Coachnan no lo ricibi pago, debi na e caida di entrada y lo hacie dificil pa sigui cumpli cu gastonan mensual. Usuarionan di crossfit pronto lo train na cas, hopi a pidi pa sea huur ekipo of ricibi un guia den un otro forma pa toch keda activo. Esey ta un reto mirando cu no tin suficiente ekipo pa huur tur cliente.
E propietario ta spera cu tur hende coopera cu y comporta p’asina por habri bek. Awe Aljereau ta cera su establicimento cu sintimento mixto, e no por compronde dicon a cera tur gym y no esunnan cu a faya. “Un a daña pa tur”, asina e propietario a finalisa bisando.
