Oficina di mr. Patrick v/d Biezen ta abogado di Zachary Quandt kende ta e sospechoso di a mata Hubert “Ski” Kock. Recherche tabata investiga e caso di Ski y despues di a ricibi suficiente informacion, e prome sospechoso a keda cera.
A detene e otro sospechosonan di cual no a detene Quandt ainda. Na momento cu el a haya sa cu recherche ta buscando su persona, el a acerca oficina di abogado v/d Biezen pidiendo pa nan represent’e.
E abogado a compaña Quandt na momento cu el a entrega su mes. Recherche a detene Quandt y e proceso penal a cuminsa cana su caminda. Abogado v/d Biezen a splica cu e no a entrega su mes prome pasobra nan ta mucha jong y e parti di susto a hunga un rol grandi. Esey a pone cu e no a entrega su mes prome. Ora cu cos tabata birando serio, el a opta pa entrega su mes.
Nan no tabatin e intencion pa tira Ski ni mat’e. E abogado a compronde cu Quandt tabata riba un trip pa un par di dia, bou di influencia di alcohol y otro substancia. Bou di e circunstancianan ey e cos aki a pasa. Loke a sali den medionan di comunicacion cu nan a bay cu e intencion pa tira riba Ski of pa loco, esaki no ta e caso. Quandt ta lamenta loke a pasa y no ta hustifica loke el a haci. Den e caso no solamente e famia di Quandt ta sufriendo, pero tambe e famia di Ski. E ta consciente di loke a pasa y ta para p’e consecuencianan.
Abogado v/d Biezen no sa si e cliente conoce e victima. E abogado ta kere cu su cliente sa ken ta e victima. Di kico Ski a fayece abogado v/d Biezen no sa pasobra e no a ricibi e rapport for di e patoloog ainda. Siman pasa el a tende di fiscal cu e rapport no ta cla ainda, pero e investigacion di e pataloog lo mustra di kico Ski a fayece.
Hopi informacion riba e arma v/d Biezen no tin, kende no sa si a haya esaki. E prome persona deteni den e caso aki tabata e chauffeur. Te cu siman pasa no a haya e arma. Na momento cu el a tira, Quandt tabata sinta patras den e auto. E abogado a sigui splica cu na momento cu nan a yega cerca, Quandt a baha bentana y a los tiro. E acusado no tabatin problema cu niun hende den Rancho, asina e abogado a expresa.
Den un caso manera esaki unda cu e persona ta admiti su culpabilidad, hues por tene cuenta cu e circumstancia di loke a pasa. Un otro punto ta e rapport, cu ainda ta bay bin. Esaki lo ta uno importante ora di haci pregunta si e victima a fayece di e tiro of no.
