E brommer MFA 1876 awe mainta, un poco prome cu 11’or, a haya su mes envolvi den un accidente riba Caya Betico Croes.
Presencia di Ambulance a ser pidi cu urgencia den bisindario di Ex Setar Store caminda e accidente a sosode. Por a constata cu tabata trata di un brommer marca Honda maneha pa un cabayero y cu pa motibo no conoci e momento ey, a perde control. Mester bisa cu e momento ey tabata dificil pa saca afo kico a pasa mirando cu e motociclista, kende a bisa di ta sufri di hernia, tabata keha di hopi dolor. E tabatin hopi rasca na su curpa, cual tabata sangra basta.
Extraoficialmente por a compronde na e sitio, cu e motociclista a dal tras di un Toyota Yaris blanco. Di con esaki a sosode, no por a saca afo mirando cu no a logra haya declaracion di e dos partidonan envolvi mesora.
Paramediconan di dos ambulance a trata e herido eybou, stabilis’e, mirando su problema cu lomba, y despues a transporte pa hospital.
