Directiva di Stichting Middelbaar Onderwijs Aruba (SMOA) a manda un reaccion riba e accion di docentenan di Colegio Arubano (Playa) cu a tuma luga diaranson. “Como Bestuur nos a tuma nota den prensa di e accion di algun docente di nos scol Colegio Arubano,” nan ta cuminsa pa bisa.
“Juffrouw Lardy tin tur derecho pa cuestiona y pa haci pregunta over di e maneho di e Bestuur. Pero ta difiil pa duna cuenta bayendo prensa y vocifera nan preocupacion sin sinta prome na mesa,” nan ta bisa.
Segun e declaracion, e directiva a purba diferente biaha pa sinta na mesa cu representante di ALV (Algemene Leden Vergadering) pa atende tur nan preocupacion. Pero nan a rechasa e intentonan. “Nan pregunta over di e maneho financiero, cu gusto nos lo sinta na mesa y contesta tur e preguntanan.”
E directiva ta haci un suplica na e representante di ALV, juffrouw Lardy pa por fabor, pasa cerca nan otro siman diaranson dia 10 Juni pa 10:00 di mainta na oficina di Rector pa asina sinta na mesa. Si e fecha of orario no ta cumbini juffrouw Lardy, esaki por wordo adapta, nan ta bisa.
Tambe nan ta pidi juffrouw Lardy pa bin cu TUR e preocupacion y preguntanan di miembronan di ALV, p’asina duna Bestuur y ALV un oportunidad pa splica nan mes.
E directiva di SMOA ta haya cu no ta husto pa acusa un partido publicamente den medionan di prensa, sin duna nan chens prome pa contesta preguntanan. “Nos ta sigur cu nos lo yega na un solucion, pasobra ALV y Bestuur tin e mesun meta. Esey ta nos studiantenan na Colegio Arubano. Ban demostra nos pueblo y specialmente nos studiantenan cu nos di Colegio Arubano ta profesional. Aunke nos tin diferencia di opinion, nos por dialoga y yega na un solucion,”
Directiva di SMOA ta consisti di Robert Croes (Presidente); Monica Kock (Secretaria); ing. Gwelda Bijen-Latham (miembro) y mr. Brechtje Huiskes (miembro).
