Diasabra nochi un referee masculino tabata ataca p’un coach di futbol. Consecuentemente el a termina seriamente herida. Esey a pone cu e refereenan a dicidi di no fluit e weganan di diadomingo. Arubaanse Voetbal Bond (AVB) a hay’e ta cancela e weganan.
Monique Ras, Head of Referee di AVB, a splica despues cu a informa su persona di e situacion cu a tuma luga riba veld, di biaha el a cuminsa busca informacion di kico tur a pasa. Despues di a haya diferente informacion, el a papia cu e referee mes. E referee a ricibi un lesion grave door di e persona cu a dal e.
Ras a haya confirmacion awe cu diasabra nochi a opera e referee cu urgencia. Nan mes no a haya resultado di kico a para cu esaki, pero nan ta lamenta e cosnan aki. Esey a pone na un punto final p’e refereenan, kendenan cu a dicidi di no fluit wega.
E head of referee mes no sa kico precies a pasa na veld. Pero na momento di e incidente, pa loke ta e wega mes, esaki a termina. E coach tabata haci cierto pregunta, pero no tabata contento cu esey y a bira dal e referee. Consecuentemente ambulance a presenta n’e sitio y hib’e pa hospital, unda e referee ta interna ainda.
Ras a splica cu den e situacion aki e referee mes ta esun cu mester entrega un denuncia. E referee a entrega su denuncia caba y e proceso lo continua.
Door di e incidente aki, e refereenan a dicidi cu nan no ta para ningun wega te cu proximo aviso. Nan a reuni caba cu AVB riba e situacion aki. Awo e asociacion di referee ta bay entrega nan puntonan riba papel, p’asina mira kico ta e siguiente stapnan.
