Mundo a pasa den temponan dificil despues di un pandemia cu a paralisa tur cos. Tur cos a cambia y e mundo cu nos a conoce, a disparce.
Scol, trabou, en fin, e bida cotidiano cu nos a conoce no tabata t’ey. Di un mundo presencial, nos a bay den un mundo virtual, sin e conexion humano. Esey a conta na Aruba tambe.
Na Aruba, mayoria scol a bay online, algo cu nos studiantenan no ta custumbra cu ne. Esaki ta loke a sosode cu Mitchell Maduro, kende cu apenas 22 aña di edad ta e miho graduado di e sector Bouwkunde di EPI Sector Ciencia & Tecnologia.
Pa Mitchel, su perseverancia, surpasa obstaculonan cu e no tabata conoce, a demostra cu awe, e tin su diploma den su man. E conta con, a pesar di tur obstaculo, awe el a logra su meta: diploma MBO den man!
ESTUDIO
Mitchell ta procedente di e bario di Noord y su formacion basico el a ricibie na St. Aloysius School. Ora cu el a termina su scol basico el a sigui pa Ceque College MAVO sigui pa EPI. Mitchell a conta cu na comienso su estudio na EPI tabata bay bon, te ora cu COVID a haci su entrada. Esaki tabata e temporada mas dificil ya cu nan a bay over na haya les online, tanto proyectonan tambe a bay online, cual sigur a hacie fastioso. Di un dia pa otro, tur cos ta cambia. Lastimamente, el a perde un aña door di dos vak. Pero asina mes, na final el a logra cu su diploma.
RETO DURANTE COVID
Mitchell a conta cu ora cu pandemia a haci su entrada, pa tur e studiantenan esaki tabata algo hopi fastioso pa custumbra cu ne, e online schooling. Esey a tarda pa nan por a custumbra cu ne tambe, cu nan ta na cas henter dia, pa nan subi computer. Como studiante e ta sinti cu e motivacion no tabata t’ey. Pocopoco el a cuminsa cu e sistema di online schooling.
Un di e retonan mas grandi pa e online schooling, tabata pa ta na tempo. Pa ta na cas, e diferente distraccionnan, etc., cu sigur no tabata facil pa a deal cu ne. Tabata temponan fastioso, manera Mitchel a bisa, pasobra cu e contacto directo cu e docentenan no tabata t’ey.
Por ehempel, un docente ta online cu entre 15 pa 20 mucha y aki ta caminda cu e tabata haya falta di e contacto individual cu docente. Online e no ta mescos, ya cu e docente no por duna atencion online di manera individual. Den un klas e ta mas personal.
SETBACK
Mas aleu, Mitchel a bisa cu dado momento el a perde un aña, door cu despues di un semester durante COVID, el a faya algun vak unda cu e vaknan ey a cay den ful un semester nobo, cual e mester a combin’e cu su stage, na final el a cay cortico pa dos vak.
Ora cu el a wak cu e no a logra e aña, e tabata un sentimento hopi fastioso, pasobra cu el a faya su vaknan pa algun punto masha chikito. E tabata haciendo asina hopi cos, ya cu na ultimo semester ta core stage pa mas o menos 4 pa 5 luna. Es decir, e tabata stage combina cu dos vak di e semester anterior mas e vaknan di e siguiente semester. El a lucha duro, pero toch el a cay cortico.
COME BACK EXITOSO
Pero asina mes, Mitchel no a entrega. El a sigui lucha duro, pasobra e tabatin un meta su dilanti. E tabata asina enfoca cu e no a laga niun obstaculo strob’e di yega na su meta final, cual tabata di logra su MBO diploma.
Y e aña aki, el a logra esaki. E tabata e miho graduado di sector Werktuigbouwkunde, di e unidad di Ciencia y Tecnologia di Colegio EPI.
P’esey, un conseho cu Mitchel tin pa tur studiante: Persevera! No laga nada stroba bo di yega na bo meta. Perseverancia ta e yabi di tur cos!
Mitchel a dicidi cu e ta bay traha un par di tempo, mientras cu e ta prepara pa e tambe bay Hulanda, pa asina e sigui cu su estudionan avansa na madre patria, Hulanda.
Headlines Group, cas editorial di 24ora.com y bo matutino digital TREMPAN, ta desea Mitchel tur cos bon pa futuro. Mitchel ta ehempel di perseverancia y optimismo, pa por logra tur loke bo kier logra den bo bida, pa futuro!
